راولپنڈی ۔ 07 مئی(اے پی پی)چیف آف آرمی سٹاف جنرل قمر جاوید باجوہ اتوار کوں کور ہیڈکوارٹر کراچی دا دورہ کیتا ، ایں موقعے تے انہاں شہر اچ سلامتی دی صورتحال ، آپریشن ردالفساد دے تحت کیتی ونجنڑآلیاں کارر وائیاں اتے صوبہ سندھ اچ مردم و خانہ شماری دے عمل اچ پاک فوج ولوں معاونت دی فراہمی بارے ڈسایا گیا۔ چیف آف آرمی سٹاف پاک فوج اتے پاکستان رینجرز (سندھ )ولوں انہاںمعاملیاں اچ کامیاب تعاون دی تعریف کیتی ۔ آئی ایس پی آر ولوں جاری پریس ریلیز دے مطابق انہاں آکھیا جو ملک اچ استحکام سانگے کراچی اچ امن دا قیام لازمی ہے ۔ آرمی چیف انٹیلی جنس ایجنسیاں اتے سیکیورٹی فورسز ولوں فراریاں کوں ولا قومی دھارے اچ رلاونڑ بارے انہاں دے مثبت کردار دی وی تعریف کیتی ۔ چیف آف آرمی سٹاف ایں عزم کوں دہرایاجو صوبہ سندھ اتے کراچی اچ مکمل امن وامان دی بحالی تئیں کوششاں کوں جاری رکھیا ویسی ۔ ایں توں پہلے کور ہیڈ کوارٹر کراچی پجنڑ تے کور کمانڈر کراچی لیفٹیننٹ جنرل شاہد بیگ مرزا چیف آف آرمی سٹاف دا استقبال کیتا۔ ایں موقعے تے ڈی جی رینجرز (سندھ) وی موجود ہن ۔
