کابینہ کمیٹی برائے توانائی دا اجلاس وزیراعظم محمد نواز شریف رمضان شریف دے دوران بجلی دی گھٹ توں گھٹ لوڈ شیڈنگ دے احکامات ڈے ڈتے،کمیٹی دا اجلاس (اج) ولا طلب

اسلام آباد ۔ 29 مئی (اے پی پی) وزیراعظم محمد نواز شریف رمضان المبارک دے دوران بجلی دی لوڈ شیڈنگ گھٹ توں گھٹ کرنڑ دے احکامات ڈتے ہن ۔سنوار کوں کابینہ کمیٹی توانائی دے اجلاس سی صدارت کریندے ہوئیں وزیرا عظم نواز شریف لوڈشیڈنگ دی موجودہ صورت حال تے کاوڑ دا اظہار کیتا ۔انہاں زور ڈتا جو سارے لائن ڈیپارٹمنٹ موسم گرمیان دے دوران عوام کوںودھ توں ودھ ریلیف ڈیوںڑ دے مقصد کوں سامنڑے رکھیندے ہوئیں فعال تے حل تے مبنی سوچ اپناون ۔وزیراعظم آکھیا جو حکومت بجلی دی گھٹکی دی وجہ توں عوام کوں درپیش مسئلے بارے بخوبی آگاہ ہے تے ایں ویلھے تئیں آرام نال کائناں بہسن جڈاں تئیں عوام کوں ریلیف کائنی مل ویندا ،صورت حال دی سنگینی کوں سامنڑے رکھیندے ہوئی وزیراعظم کابینہ دی توانائی کمیٹی دا اجلاس (اج) منگل کوں ولا سڈ گھدا ہے ۔ کمیٹی کوں ڈسایا گیا جو مارچ 2018اچ 9 ہزار 107 میگاواٹ دی ودھ بجلی ٹرانسمیشن سسٹم اچ دستیاب ہوسی ۔ سیکرٹری پانڑیں تے بجلی کمیٹی کوں بریفنگ ڈیندے ہوئیں کابینہ دی توانائی کمیٹی دے گزریل اجلاساں دے فیصلے تے پیشرفت، حالیہ لوڈ مینجمنٹ پلان، سرکلر ڈیٹ، آونڑ آلے توانائی دے منصوبیں نال بجلی دی وند تے ٹرانسمیشن اتے پاور پلانٹس دے استعمال دے حوالے نال تازہ صورتحال بارے ڈسایا۔ کمیٹی کوں ڈسایا گیا جو بھکی اتے حویلی بہادر شاہ پلانٹس دے کجھ ٹربائین کوںمعمول دے تکنیکی مسلیں دا سامنڑاں ہے جیرھا جو مینوفیکچر ولوں حل کیتا ویندا پیا ہے ۔ وزیراعظم ہدایت کیتی جو مرمت دا کم وختی پورا کیتا ونجے اجلاس کوں ڈسایا گیا جو وزارت پٹرولیم تے قدرتی وسائل دی خصوصی کمیٹی روایتی ایندھن نال ایل این جی تے منتقلی سانگے متوازن متبادل منصبوبے تے کم کریندی پئی ہے ۔کمیٹی کوں ڈسایا گیا جو بجلی دی پیداوار تے ونڈ دے نظام دی مانیٹرنگ دا کم باقاعدگی نال کیتا ویندا پیا ہے جڈاں جو 270منصوبیں دی وی مانیٹرنگ کیتی ویندی پئی ہے اجلاس اچ وزیر خزانہ اسحاق ڈار، وزیر پانڑیں تے بجلی خواجہ محمد آصف، وزیر پٹرولیم و قدرتی وسائل شاہد خاقان عباسی، وزیراعلیٰ پنجاب محمد شہباز شریف تے بے حکام شرکت کیتی ۔