پاکستان اتے چین گوادر شہر دی ترقی اتے خصوصی اقتصادی زونز کوں عملی شکل ڈیونڑ سانگے بہوں ساریاں مفاہمتی یاداشتاں تے دستخط کر ڈتے
اسلام آباد ۔ 16 مئی (اے پی پی) پاکستان تے چین وچال گوادر شہر دی ترقی اتے خصوصی اقتصادی زونز کوں عملی شکل ڈیونڑ سانگے بہوں ساریاں مفاہمتی یاداشتاں تے دستخط تھی گے ہن ، انہاں معاہدیں پاروں جتھاں گوادر شہر کوں بین الاقوامی تے جدیدد بندرگاہ بنڑاونڑ اچ مدد ملسی اتھاں اقتصادی زونز کوں عملی شکل ڈے تے پاکستان اچ صنعتی انقلاب سانگے رستہ ہموار تھی ویسی ۔بےجنگ اچ وفاقی وزیر منصوبہ بندی، ترقی تے اصلاحات احسن اقبال تے وزیر اعلیٰ بلوچستان ثناءاللہ زہری دی موجودگی اچ گوادر ڈیویلپمنٹ اتھارٹی اتے چین دے وزارت کامرس وچال گوادر ماسٹر سٹی پلان دے معاہدے و منٹس اتے گوادر ایسٹ بے ایکسپریس وے دے منٹس تے دستخط کیتے گے ہن ، ایں موقع تے وفاقی وزیر احسن اقبال آکھیا جو گوادر شہر کوں سنگاپور تے ہانگ کانگ دے معیار دے مطابق تعمیر کیتا ویندا پیا ہے اتھاں پہلے ہی سرمایہ کاراں ولوں بہوں دلچسپی دا اظہار کیتا گیا ہے تاں جووختی ایں شہر کوں بین الاقوامی بندرگاہ دی حیثیت حاصل تھی ویسی
