اسلام آباد ۔ یکم جون(اے پی پی) صدر مملکت ممنون حسین آکھیا ہے جو بھارت خطے دے امن تے استحکام اچ ساریں توں وڈی رکاوٹ ہے ‘ مسئلہ کشمیر داہکو حل اقوام متحدہ دیاں قرارداداں دے مطابق استصواب رائے ہے‘ کنٹرول لائن تے مسلسل جارحیت اتے بے گناہ کشمیریاں تے ظلم قابل مذمت ہے‘ انتہا پسندی دے خاتمے سانگے حکومت ،پارلیمنٹ دے رکناں سیاسی جماعتاں تے علمی تے تحقیقی اداریں کوں فعال کردار ادا کرنڑ دی ضرور ت ہے ،افغان قیادت کوں سانجھے تعاون نال سرحدی نظم و نسق چنگاں بنڑاونڑ دی دعوت ڈیندوں ،چین پاکستان اقتصادی راہداری منصوبہ پورے خطے دسانگے ترقی تے خوشحالی دا ذریعہ بنڑ ویسی ،پاکستان اچ شرح نمو گزریل ڈا ہ سال اچ ساریںتوں اچی سطح تے ہے ،زرمبادلہ دے ذخیرے 23ارب ڈالر توں ودھ گے ہن ،افراط زر اچ چنگی گھٹکی تھی ہے ،عالمی ادارے ایندے اچ بہتری دی تعریف کریندے پن ،غربت دے خاتمے سانگے قومی سطح تے سخت محنت دی ضرور ت ہے ،پاکستان سفارتی میدان اچ وی اہم کامیابیاں حاصل کیتیاں ہن ۔پاکستان اسلامی دنیا دے مسئلے دے حل سانگے ہمیشہ مخلصانہ کردار ادا کیتا ہے ،اقوام متحدہ کوں مزیدمفید بنڑاونڑ سانگے سلامتی کونسل اچ اصلاحات ضرور ی ہن ۔خمیس کوں پارلیمنٹ دے ڈوہیںایواناں توں خطاب کریندے ہوئیں صدر مملکت ممنون حسین آکھیا جو پاکستان جمہوریت وڈے نشیب فرا ز ڈٹھے ہن ،اساڈی جمہوریت آزمائش توں گزری ہے اساں قوم دے عزم دی بدولت ایں وڈے وڈے معرکے سر کیتے ہن جیں پاروں اساڈی پارلیمان دا اپنڑے حقیقی مقاصدر دے حصول ولوں کامیابی نال سفر جاری ہے ۔
