سرائیکی خطہ دے صحافیاں ولوں سانحہ احمد پور شرقیہ دے متاثرین نال اظہار یکجہتی ،شہداءاتے زخمیاں سانگے دعائیہ تقریب کیتی گئی

اسلام آباد۔ 07 جولائی (اے پی پی)سرائیکی خطہ دے صحافیاں ولوں سانحہ احمد پور شرقیہ دے متاثرین نال اظہار یکجہتی ،شہداءاتے زخمیاں سانگے دعائیہ تقریب کیتی گئی اتے انہاں دی یاد اچ ڈیوے بالےے گئے ۔ایں موقع تے گالھ مہاڑ کریندیں ہوئیں رکن قومی اسمبلی علی حسن گیلانی آکھیا جو سانحہ احمد پور شرقیہ اچ218بندے زندگی دی بازی ہر چکین ۔30توں ودھ زخمیاں دی حالت تشویشناک اے۔انہاں آکھیا جو سرائیکی وسیب اچ برن یونٹ دا نہ ہوونڑ افسوسناک اے جڈانجو حکومت زخمیاں دے فوری علاج معالجہ اتے متاثرین کوں سہولت ڈیونڑ سانگے اقدامات کیتن۔انہاں آکھیا جو اپوزیشن ایں قومی سانحہ تے صرف سیاست کریندی پئی اے،پاکستان تحریک انصاف دے سربراہ عمران خان حالی تئیں احمد پور شرقیہ کائنی گئے ،او صرف وزیراعظم بنڑنڑ سانگے ،وزیراعظم توں پانامہ داحساب منگنڑ چاہندن۔۔چیئرمین ورلڈ سرائیکی کانگریس ڈاکٹر غضنفر مہدی آکھیا جوسرائیکی وسیب دے لوک چورڈاکو کائنی جڈانجو اتھاں پسماندگی،ترقی اتے تعلیم نہ ہوونڑ پاروں او لوک اتھاں آئے اتے ناگہانی آفت دا شکار تھےے۔انہاں آکھیا جو حکومت سرائیکی وسیب اچ یونیورسٹیاں اتے صحت دی بنیادی سہولتاں ڈیوے اتے برن یونٹ دا قیام یقینی بنڑاوے۔ایں موقع تے پی ایف یوجے دے صدر افضل بٹ ،صدر نیشنل پریس کلب شکیل انجم ،سیکرٹری نیشنل پریس کلب عمران یعقوب ڈھلوں،سیکرٹری آر آئی یوجے علی رضا علوی وی شہیداں کوں خراج عقیدت پیش کیتا۔ ایں موقع تے سبطین رضا لودھی ،رانا ابرا رخالد،غضفر عباس،عامر رفیق بٹ،صفدر کلاسرا،نعیم روحانی،اسلم چانڈیو،فرحت عباس،رخشندہ تاج بلوچ،صنم جونیجو،شاہد دھریجہ،ناصر عباس،نعیم خان اتے وڈی تعداد اچ صحافیاں اتے سرائیکی کمیونٹی دے لوک شریک تھےے۔تقریب دے چھیکڑ اچ میزبان سعدیہ کمال شریک تھیونڑ آلیاں دا شکریہ ادا کیتا۔