اسلام آباد ۔ 27 جولائی (اے پی پی) وفاقی وزیر خزانہ سینیٹراسحاق ڈار آکھیا ہے جومخالفاں کوں پاکستان دی ترقی تے خوشحالی ہضم کائنی تھیندی پئی ،گزریل چار سال اچ پاکستانی معیشت چنگی ترقی کیتی عالمی ادارے وی پاکستانی معیشت اچ بہتری کوں من گھدا ہے۔اساں پاکستان کوں اقتصادی طور تے خود مختار بنڑایا ہے ۔او خمیس کوں اتھاں ایف بی آر ہیڈ کوارٹرز اچ چوتھی پارلیمنٹرینز ٹیکس ڈائریکٹری دے اجراء دی تقریب توں خطاب کر یندے پے ہن۔ انہاں آکھیا جو گزریل چارسال اچ پاکستانی معیشت بہوں چنگی ترقی کیتی ہے اساں پاکستان کوں اقتصادی طورتے خودمختار بنڑائے۔ اسحاق ڈارآکھیا جو (اوپن گورنمنٹ پارٹنرشپ) او جی پی دی رکنیت دے حصول سانگے پونڑیں ڈو سال سخت محنت کیتی ہے ، اے کلب دی ممبرشپ کائنی جو اپلائی کیتا تے مل گی۔ ایں موقع تے وزیر خزانہ پارلیمنٹرینز ٹیکس ڈائریکٹری دا باضابطہ اجراء کیتا۔پاکستان مسلم لیگ ن دی حکومت ولوں مسلسل چوتھے سال اراکین پارلیمنٹ دی ٹیکس ڈائریکٹری دا اجراء کیتا گیا ہے۔ ۔ٹیکس ڈائریکٹری اچ 1010ارکان پارلیمنٹ دے ٹیکساں متعلق تفصیلات شامل ہن جیرھا جو ایف بی آر دی ویب سائٹ تے دستیاب ہن ۔گذریل سال 996اراکین پارلیمنٹ دی ٹیکس تفصیلات ڈائریکٹری اچ شائع کیتیاں گیاں ہن۔ بئے پارلیمنٹ دے ارکاناں کوں ہک مہینے دا اضافی وقت ڈتا گیا ہے تا ںجو او اپنڑی ٹیکس تفصیلات دا اندارج کراسگن ۔واضح رہے جو پاکستان دنیا داچوتھا ملک ہے جیں ارکان پارلیمنٹ دی ٹیکس ڈائریکٹری شائع کیتی ہے ۔ایں موقع تے ڈسایا گیا جو موجودہ حکومت دے گزریل چار سال دے دوران ٹیکس وصولیاں اچ 73فیصد دا ودھارا ریکارڈ کیتا گیا ۔ٹیکس ڈائریکٹری دے اجرا دی تقریب اچ وزیراعظم دے معاون خصوصی ریونیو ہارون اختر خان ‘چیئرمین ایف بی آر اتے بئے حکام وی موجود ہن
