اسلام آباد۔ 13 جولائی (اے پی پی) وفاقی وزیر ترقی و منصوبہ بندی احسن اقبال آکھیا جو اقتصادی راہداری منصوبہ پورے ملک دا منصوبہ اے جئیں نال سارے صوبے فائدہ چیسن ،سی پیک منصوبے نال ساریاں توں ودھ سرمایہ کاری سندھ اچ تھیسی،منصوبے بارے من گھڑت پروپیگنڈا کرنڑ آلے پاکستان کوں ترقی کریندا نی ڈیکھ سگدے،پشاور توں کراچی تئیں ریلوے دے نظام کوں اپ گریڈ کیتا ویسی جڈانجو پشاور توں کراچی تئیں سگنل سسٹم وی لاتا ویسی،کراچی۔پشاور ایم ایل ون منصوبہ2018ءدے چھیکڑ تئیں پورا تھی ویسی،کراچی حیدرآباد موٹروے اگست2018ءتئیں پورا تھی ویسی۔چین توں پاکستا ن اچ کول پاور پلانٹ سانگے نویں مشینری آندی گئی اے،ماضی اچ سیاسی عدم و استحکام پاروں ضیان تھیا،ترقیاتی منصوبیاں وچال اساڈے نینگراں وی قربانیاں ڈتیاں۔او خمیس کوں نیشنل لاجسٹک سیل پاروں سی پیک لاجسٹکس انٹرنیشنل فورم نال خطاب کریندے پئے ہن ۔احسن اقبال آکھیا جو ماضی اچ پاکستان جیو پولیٹیکل گیمزدا حصہ بنڑیا جئیں پاروں اساں ترقی کائنی کر سگےے۔20ویں صدی سیاسی گروپ بندیاں دی صدی ہئی جئیں اچ عالمی سطح تے مختلف کھیڈ کھیڈےے گئے اتے بدقسمتی نال پاکستان دی معیشت انہاں کھیڈاں پاروں ترقی کائنی کر سگی،80دی دہائی اچ فی کس آمدنڑی 200ڈالر ہئی جڈانجو اج300ڈالر اے ،جڈانجو چین دی فی کس آمدنڑی 300ڈالر ہئی اتے 800ڈالر تئیں پج گئی اے۔چین دی بنیادی ترقی دی وجہ انہاں دے لیڈاں دا قوم نال مخلص ہوونڑ ہئی۔
