اسلام آباد ۔ 10 اگست (اے پی پی) الیکشن کمیشن توہین عدالت کیس اچ اپنڑاں دائرہ اختیار چیلنج کرنڑ بارے تحریک انصاف دے چاتے گے اعتراض تے فیصلہ ڈیندے ہوئیں عمران خان کوں توہین عدالت اچ شو کاز نوٹس جاری کر ڈتا ہے ۔الیکشن کمیشن ولوں محفوظ کیتا گیا فیصلہ خمیس کوں چیف الیکشن کمشنر جسٹس (ر) سردار محمد رضا دی سربراہی اچ 5رکنی پنج فیصلہ سنڑا ڈتا ،جیں اچ کمیشن قرار ڈتا ہے جو الیکشن کمیشن توہیں عدالت دی سماعت دا اختیار رکھیندا ہے ،کمیشن تحریک انصاف دے سربراہ عمران خان کوں توہین عدالت دا شو کاز نوٹس جاری کریندے ہوئیں 23اگست تئیں جواب منگ گھدا ہے ۔ایندے توں پہلے 25جولائی کوں الیکشن کمیشن اچ سماعت دے دوران تحریک انصاف دے بانی رہنما اکبر ایس بابر دے وکیل عمران خان دے خلاف توہین عدالت دی کاروائی عمل اچ لاونڑ دے حق اچ دلائل ڈتے تے پی ٹی آئی چیئرمین کو ںشوکازنوٹس جاری کرنڑ دی استدعا کیتی تاں جو عمران خان دے وکیل ڈاکٹر بابراعوان الیکشن کمیشن دادائرہ اختیار چیلنج کرڈتاتے موقف اپنایا جو توہین عدالت دے اختیارات ہائی کورٹ اتے سپریم کورٹ کوں حاصل ہن تاں جوالیکشن کمیشن کو ں اے اختیار حاصل کائنی۔ ڈاکٹر بابراعوان مختلف مقدمیں دا حوالہ ڈیندے ہوئیں آکھیا جو توہین عدالت دی عملی عدالتی کارروائی ہوندی ہے اتے یوگنڈا جیہوجے ملک چ الیکشن کمیشن کوں اے اختیار حاصل ہے تاں جو پاکستان اچ اختیار حاصل کائنی ، حتیٰ کہ برطانیہ اچ وی الیکشن کمیشن کوں اے اختیار حاصل کائنی۔ فریقین دے دلائل سنڑ گھننڑ دے بعد الیکشن کمیشن فیصلہ کرگھدا ہئی جیرھا جو اج )خمیس کوں( سنڑایا گیا۔
