سلام آباد ۔ 17 اگست (اے پی پی) وزیراعظم شاہد خاقان عباسی آکھیا ہے جو حکومت جنوبی پنجاب دی ترقی تے توجہ ڈیندی پئی ہے،، مسلم لیگ (ن) عوامی خدمت سانگے پر عزم ہے لہٰذا ارکان قومی اسمبلی اپنڑے اپنڑے حلقیں اچ عوام دے مسئلے دے حل سانگے پورے جذبے تے ولولے دے نال کم کرن۔ انہاں اے گالھ بہاولپور ڈویژن نال تعلق رکھنڑ آلے مسلم لیگ (ن) دے ارکان اسمبلی دے وفدنال گالھ مہاڑ کریندے ہوئیں آکھی جنہاں اتھاں خمیس کوں انہاں نال ملاقات کیتی۔ وزیر اعظم آفس ولوں جاری بیان دے مطابق ارکان قومی اسمبلی وزیر اعظم کوں اپنڑے اپنڑے حلقے دے ترقیاتی منصوبیں بارے ڈسایا ۔وزیراعظم آکھیا جو حکومت جنوبی پنجاب دی ترقی تے توجہ ڈتی ہوئی ہے ۔انہاں وزیراعظم آفس کوں ہدایت کیتی جواو ایس ڈی جی فنڈز توں خاص طور تے بجلی تے گیس دیاں سکیماں اتے بالعموم علاقے دے بئے منصوبیں سانگے وختی فنڈز جاری کرے۔ وزیرا عظم آکھیا جو او ترقیاتی منصوبیں دی ذاتی طور تے نگرانی کریسن تے علاقے دے ارکان قومی اسمبلی عوامی شکایات دے حل سانگے انہاں نال کہیں ویلھے وی رابطہ کر سگدے ہن ۔ وزیر بین الصوبائی رابطہ ریاض حسین پیرزادہ ، وزیر مملکت صنعت وپیداوار ارشد خان لغاری، ارکان قومی اسمبلی مخدوم سید علی حسن گیلانی، سید محمد ا صغر، طاہر بشیر چیمہ، شیخ فیاض الدین ، مخدوم خسرو بختیار، میاں امتیاز احمد، محترمہ زیب جعفر ، مائزہ حمید، اتے مسز صبیحہ نذیر وی ایں موقع تے موجود ہن۔ وزیر پارلیمانی امور شیخ آفتاب احمد وی ملاقات اچ شریک ہن۔
