پاکستان متحدہ عرب امارات دے نال اپنڑے تعلقات کوں بہوں اہمیت ڈیندا ہے ، شیخ زید بن سلطان النہیان دے ورثے کوں اگی تے ودھاونڑ دی ضرورت ہے
اسلام آباد ۔ 16 اگست (اے پی پی) صدر مملکت ممنون حسین آکھیا ہے جو پاکستان متحدہ عرب امارات دے نال اپنڑے تعلقات کوں بہوں اہمیت ڈیندا ہے ، شیخ زید بن سلطان النہیان دے ورثے کوں اگی تے ودھاونڑ دی ضرورت ہے ۔انہاں اے گالھ متحدہ امارات دے سبکدوش تھیونڑ آلے سفیر عیسیٰ عبداللہ الباشا النعیمی نال گالھ مہاڑ کریندے ہوئیں آکھیا جنہاں بدھ کوں ایوان صدر اچ انہاں نال ملاقات کیتی ۔صدر مملکت آکھیا جو پاکستان ایں خطے اچ دہشت گردی دا ساریں توں وڈا ہدف ہئی لیکن اللہ سئیں دے فضل نال ایندے تے وڈی حد تئیں قابو پا گھدا گیا ہے ۔وختی ہی ایں فتنے دا پورا خاتمہ کر ڈتا ویسی ۔ایندے بعد ملک اچ اقتصادی سرگرمیاں دی رفتار تکھی تھی ویسی ۔ صدر مملکت آکھیا جو پاک امارات تعلقات امارات دے بانی شیخ زید بن سلطان النہیان دا شاندار ورثہ ہن جیں توں رہنمائی حاصل کریندے ہوئیں ایندے اچ مزید ودھارے دی ضرورت ہے ۔
