وزیراعظم شاہد خاقان عباسی دی صدارت اچ اقتصادی رابطہ کمیٹی دا اجلاس

اسلام آباد۔ 29 اگست (اے پی پی) اقتصادی رابطہ کمیٹی (ای سی سی) پاکستان سٹیل ملز دے ملازماں کوں ڈومہینیاں دی تنخواہ ڈیونڑ اتے گلگت بلتستان کوں ایں مالی سال دے چھیکڑ تئیں کنڑک دی سبسڈی اچ ڈو روپے فی کلو ودھارے دی منظوری ڈتی اے۔اقتصادی رابطہ کمیٹی دا اجلاس منگل کوں وزیراعظم شاہد خاقان عباسی دی صدارت اچ تھیا۔ای سی سی پٹرولیم ڈویژن ولوں صوفیہ گیس فیلڈ توںسوئی سدرن گیس کمپنی (ایس ایس جی سی) کو ں14.2 ایم ایم سی ایف ڈی گیس ڈیونڑ دی تجویز دی منظوری ڈتی۔اے فیصلہ نیڑے دے ٹرانسمیشن نیٹ ورک دی دستیابی اتے اوں بلاک توں ایس ایس جی سی کوں پہلے توں ڈتی ونجنڑ آلی گیس دے پہلو کوں ڈیکھدیں ہوئیں کیتا گئے ۔ای سی سی سڑک تئیں رسائی،اراضی دی دستیابی اتے سکیورٹی ایشوز کوں ڈیکھدیں ہوئیں ایل پی جی ایئر مکس دے چار منصوبیاں دی جاہ تبدیل کرنڑ دی منظوری ڈے ڈتی۔ایں فیصلے دے مطابق ایئر مکس پراجیکٹ ملکوٹ (کے پی کے) کوں بالاکوٹ اچ منصوبے نال ، فارورڈ کہوٹہ کو دروش (چترال)، ہجیرہ (اے جے کے) کو بیور تحصیل کہوٹہ اتے عباس پور (اے جے کے) کو ںباند تحصیل مری نال تبدیل کرنڑ دی تجویز اے۔