اسلام آباد ۔ 29 اگست (اے پی پی) فریضہ حج دی ادائیگی سانگے ساری دنیا توں آئے ہوئے 20 لکھ توں ودھ عازمین حج (اج) بدھ کوں منیٰ روانہ تھی ویسن جتھوں 9 ذی الحج (خمیس کوں) فریضہ حج د ی ادائیگی سانگے میدان عرفات پج ویسن ۔ میدان عرفات اچ ظہر تے عصر دی نماز ہک ٹائم ادا کرنڑ تے مسیت نمرہ اچ سعودی عرب دے مفتی اعظم دے خطبہ حج سنڑ گھننڑ دے بعد عصر تے مغرب وچال وقوف تھیسی جیں اچ اللہ سئیں دے حضور حاجی ذکر تے تسبیح دے نال نال خصوصی دعاواں کریسن ۔مغرب دی نماز توں پہلے ہی میدان عرفات چھوڑنڑ دا حکم ہے ۔ہکے واری 20لکھ بندے میدان عرفات توں واپس مزدلفہ روانہ تھیسن۔ مزدلفہ پج تے حجاج کرام مغرب تے عشادی نماز کٹھی پڑھسن تے رات کھلے اسمان تلے قیام تے نماز فجر دی ادائیگی دے بعد منیٰ اچ قائم اپنڑے خمیں اچ ویسن ۔قربانی دے بعد وال منوا گھنسن ۔پہلے ڈینھ شیطان کوں وٹے مارنڑ دے بعد حاجی مکتہ المکرمہ ونج تے مسیت الحرام اچ طواف زیارت کر سگدے ہن۔ ایں دے بعد ڈوجھے تے تریجھے ڈینھ وی شیطان کو ں وٹے مارنڑ حج دے رکن اعظم اچ شمار تھیندا ہے تے ترئے ڈینہاں اچ رات دا ہک خاص پہر گزارنڑاں سارے عازمین حج تے واجب ہے ۔تریجھے ڈینھ شیطان کوں وٹے مارنڑ دے بعد سارے حاجی مستقل طور تے منیٰ توں مکہ روانہ تھیسن ۔اینویں مناسک حج پورا تھی ویسی ۔
