افغانستان اچ امن تے سکیورٹی سانگے ذمے واری نی گھن سگدے ، پاکستان تے بھارت کوں مذاکرات دی میز دتے گھن آونڑ سانگے نویں اقدامات دی ضرورت ہے،وزیر خارجہ خواجہ محمد آصف دا نیو یارک اچ ایشیا سوسائٹی توں خطاب

اساکوں او کرنڑ کوں آکھیا ویندا پے جیرھا دنیا دے بہوں طاقت ور تے امیر ملک وی نی کر سگیے ،افغان مسئلے دا عسکری حل ناکام تھی گیا ہے ،افغان بارڈر دی موثر مینجمنٹ ہی اصل کنجی ہے ،ایں سانگے امریکہ دے نال کم کرنڑ دے خواہش مند ہوں
نیویارک ۔ 27 ستمبر (اے پی پی) وزیر خارجہ خواجہ محمد آصف آکھیا ہے جو پاکستان افغانستان دے مسئلے دے پر امن حل سانگے سہولتاں ڈیونڑ تے امریکہ دے نال افغان سرحد تے موثر مینجمنٹ سانگے تیار ہے تاں جو دہشت گرداں دی مداخلت کوں روکیا ونج سگے ۔او گزریل ڈینھ ایشیائی سوسائٹی توں خطاب کریندے پے ہن ۔وزیر خارجہ انہاں ڈینہاں اقوام متحدہ دی جنرل اسمبلی دے 72ویں اجلاس اچ شرکت سانگے نیو یارک اچ ہن ۔افغانستان دیاں ساریاں بیماریاں سانگے پاکستان کوں قربانی دا بکرا بنڑاونڑ درست کائنی ۔انہاں آکھیا جو پاکستان ماضی اچ افغانستان دے مسئلے دے سیاسی حل سانگے ہر ممکن سہولتاں ڈتیاں ہن جڈاں جو پاکستان اے یقین دہانی کرائی ہے جو ایندی سرزمین کہیں ملک دے خلاف استعمال کائناں کرنڑ ڈیسوں ۔انہاں آکھیا جو پاکستان دے بھارت دے نال تعلقات ،کشمیر دا مسئلہ ،انسداد دہشت گردی سانگے چاتے اقدامات تے ملک دی اقتصادی ترقی دا احاطہ کیتا ۔انہاں ایشیا سوسائٹی دے ایگزیکٹو نائب صدر ٹام نگورسکی دا خیر مقدم کیتا ۔پروگرام دی میزبانی کولمبیا یونیورسٹی دے جرنلزم دے استاد معروف امریکی صحافی سٹیو کول کیتی ۔خواجہ آصف آکھیا جوپاکستان کہیں وی ملک توں ودھ تے افغانستان اچ امن تے استحکام دی بحالی دا خواہش مند ہے ۔ایندی وجہ نال افغانستان دے نال سرحد تے عدم استحکام تے جھیڑے دا سامنڑاں ہے ۔اساڈی خواہش ہے جو افغانستان اچ جاری طویل جنگ اپنڑے چھیکڑ کوں پجے ۔ایں مقصد سانگے دلی طور تے اساں پورے تعاون تے ایں ضمن اچ کہیں وی قسم دی مدد سانگے تیار ہوں ۔اساں افغانستان اچ امن چاہندوں ۔انہاں آکھیا جو اتھاں پاکستان دی حدود وڈی واضح ہے جو ایں کیا کرنڑاں ہے ۔اساں افغانستان اچ امن تے سیکورٹی دی ذمے واری نی گھن سگدے ۔اساکوں او کرنڑ کوں آکھیا ویندا پے جیرھا دنیا دے طاقتورتے امیر ملک نی کر سگیے۔ انہاں آکھیا جو موثر مینجمنٹ ہی اصل کنجی ہے ۔افغانستان ولوں سرحد تے مزید کم کرنڑ دی ضرورت ہے جتھاں دہشت گرد عناصر اپنڑی سوکھی پناہ گاہ تلاش کر رکھیا ں ہن ۔انہاں آکھیا جو ایں مسئلے دا عسکری حل نادانی ہے تے اے ناکام تھی گیا ہے ۔انھاں آکھیا جو اساں افغان بارڈر دی موثر مینجمنٹ سانگے امریکہ دے نال رل تے کم کرنڑ چاہندوں ۔ایندے نال نال امن تے عمل اچ سہولتاں وی ڈے سگدوں ۔انہاں آکھیا جو داعش جیہوجے نویں ابھردے ہوئے چیلنج نال نبڑنڑ سانگے اساں ہم خیال ملکاں اچ ودھ سارے تعاون تے پکی سانجھے داری دے نال انتہا پسندی انہاں تاریک طاقتاں دے خلاف ہک مٹھ تھی تے لڑنڑاں ہوسی ۔ہک سوال دے جواب اچ وزیر خارجہ آکھیا جو پاکستان تے بھارت کوں مذاکرات دی میز تے گھن آونڑ سانگے اقدامات دی ضرورت ہے جتھاں کئی سالاں پرانڑیں کشمیر دے مسئلے جیرھا جو ڈوہیں ملکاں وچال کشیدگی دی بنیادی وجہ ہے سمیت سارے مسئلے دے گالھ تھیوے ۔