اسلام آباد ۔ 7 ستمبر (اے پی پی) الیکشن کمیشن آف پاکستان ، پاکستان تحریک انصاف دے سربراہ عمران خان کوں آخری موقع ڈیندے ہوئیں پارٹی دی غیر ملکی فنڈنگ متعلق تفصیل 11ستمبر تئیں جمع کراونڑ دی ہدایت کیتی ہے ۔خمیس کوں چیف الیکشن کمشنر سردار محمد رضا خان دی سربراہی اچ 5رکنی کمیشن پی ٹی آئی غیر ملکی فنڈنگ کیس دی سماعت کیتی ،کمیشن ہدایت کیتی جو پی ٹی آئی غیر ملکی فنڈنگ کیس اچ جیرھا ریکارڈ سپریم کورٹ اچ جمع کروایا ہے اوہو الیکشن کمیشن آف پاکستان اچ جمع کراوے۔سماعت دے دوران چیف الیکشن کمشنر سوال کیتا جو پی ٹی آئی الیکشن کمیشن دے احکامات تے عملدرآمد کیوںنی کریندی۔پی ٹی آئی دے وکیل فیصل چوہدری درخواست کیتی جو کیس ہائیکورٹ اچ وی زیر سماعت ہے ایں انگے الیکشن کمیشن اچ سماعت روکی ونجے ۔ چیف الیکشن کمشنر آکھیا جو کمیشن کیس دی سماعت جاری رکھیسی کیوں جو ہائیکورٹ ایندے تے کوئی حکم امتناع جاری کائنی کیتا،کمیشن کیس دی سماعت 11ستمبر تئیں ملتوی کر ڈتی،الیکشن کمیشن آف پاکستان دے سامنڑے میڈیا نال گالھ مہاڑ کریندے ہوئیں درخواست گزار اکبر ایس بابر آکھیا جو عمران خان اج وی کوئی ریکارڈ پیش کائنی کیتا تے الیکشن کمیشن اینکوں پارٹی دی غیر ملکی فنڈنگ متعلق ریکارڈ پیش کرنڑ دا چھیکڑی موقع ڈتا ہے ۔انہاں آکھیا جو پی ٹی آئی ولوں سپریم کورٹ اچ جمع کرائی گی تفصیل اچ پارٹی دی فارن فنڈنگ دی ٹریل کائنی،انہاں الیکشن کمیشن توں اے معاملہ نیب اتے ایف آئی اے کوں بھجواونڑ دی استدعا کیتی۔
