روہنگیا دے مسلماناں دے نال اظہار یکجہتی سانگے پارلیمانی وفد بنگلہ دیش بھجوایا ونجے‘ سابق وزیر داخلہ چوہدری نثار علی خان

اسلام آباد ۔ 20ستمبر (اے پی پی) سابق وزیر داخلہ چوہدری نثار علی خان آکھیا ہے جو روہنگیا دے مسلماناں دے نال اظہار یکجہتی سانگے پارلیمانی وفد بنگلہ دیش بھیجا ونجے ،روہنگیا دے مسلمان پناہ گزیناں سانگے امدادی فنڈز قائم کیتا ونجے ،امریکہ ولوں ڈرون حملے تے مذمتی بیان آونڑاں چاہیدا ہئی ۔برطانوی پارلیمنٹ دے قائد حزب اختلاف دے پاکستان دے حوالے نال بیان تے سپیکر ولوں شکریہ دا خط بھیجا ونجے ۔بدھ کوں قومی اسمبلی اچ میانمار اچ روہنگیا مسلماناں تے کیتے ونجنڑ آلے ظلم دے حوالے نال بحث اچ حصہ گھندے ہوئے سابق وزیر داخلہ چوہدری نثار علی خان آکھیا ہے جو برطانیہ دے قائد حزب اختلاف گزریل ڈینہاں پاکستان دے حوالے نال اہم بیان ڈتا ہے ،اتنی کوشش دے باجوود دنیا اچ اساڈے یار بہوں گھٹ ہن ،مغرب اچ پاکستان دے موقف دی تائیدکرنڑ اہم گالھ ہے ،جرمی کارنی دنیا کوں آکھیا ہے جو او پاکستان دیاں قربانیاں کوں سامنڑے رکھیندے ہوئیں ایندی عزت کرن ۔چوہدری نثار علی خان آکھیا جو ایں ایوان ولوں حکومت تے اپوزیشن رل تے ہک خط دے ذریعے جرمی کارمی دا شکریہ ادا کیتا ونجے ،خط سپیکر ولوں ہووے تے اساڈے برطانیہ دے ہائی کمشنر اے خط انہاں کوں پجاون ۔انہاں آکھیا جو ڈرون حملے دے حوالے نال پارلیمنٹ دے ڈوہیں ایواناں دیاں قراردادں موجود ہن تاںجو اے پاکستان دی آزادی تے خودمختاری دے خلاف ہن ،15ستمبر کوں تھیونڑ آلے ڈرون حملے تے حکومت ولوں مذمت یا نا پسندگی دا اظہار وی نی کیتا گیا ۔واضح قرارداداں دے بعد وی اگر ڈرون حملہ تھیندا ہے تاں ایندے خلاف آواز چاونڑیں چاہیدی ہے تے امریکہ دے نال اساکوں کوئی نیک تمنا دیاں ملاقاتاں دی کوئی ضرورت کائنی ۔انہاں چین اچ برکس دا حوالہ ڈیندے ہوئیں آکھیا جو چین ایں کانفرنس دا میزبان ملک ہئی ۔بھارت ہک سال پہلے پاکستان دے خلاف جیرھی قرار داد منظور کائنی کرا سگیا او چین اچ برکس کانفرنس دے دوران منظور کیتی گی ،اساڈے ذمے وار سفارت کار ایں حوالے نال ہوم ورک کیوں کائنی کیتا ،او کیرھی مرض دی دوا ہن جیرھے اساڈی عزت نفس تے وقار دا وی تحفظ کائنی کر سگیے انہاں دی جواب طلبی تھیونڑیں چاہیدی ہے ۔اساڈے دوست ملک اچ اے کانفرنس تھی مگر اساکوں اطلا ع تئیں کائنی ڈتی گی ۔وزیراعظم سفیراں نال ملاقات کیتی تاں چنگی گالھ ہے ۔روہنگیاں دے مسلماناں تے ڈھائے ونجنڑ آلے ظلم دی گالھ کریندے ہوئیں انہاں آکھیا جو روہنگیاں دے مسلمان تے ظلم ایجھے واقعات ہن جیرھے جو صرف مسلماناں سانگے نی بلکہ انسانیت سانگے مقام عبر ت ہن ۔حاملہ تریمتاں کوں کوہاڑیاں نال زناوراں وانگوں کٹیا گیا مگردنیا ایندے تے چپ ہے ۔انہاں واقعات اچ بر ما بطور ریاست اتھاں دی فوج حکومت شامل ہے ایں حوالے نال صرف قرار داد کافی کائنی ،بطور مسلمان اساں عملی اقدامات کروں ۔جڈاں وی مسلماناں تے ظلم تھیندا ہے اتھاں آواز کائنی چیندے پاکستان کوں او آئی سی دا اجلاس سڈ تے مطالبہ کرنڑاں چاہیدا ہے ۔انہاں آکھیا جو سپیکر سارے مسلمان ملکاں ،سیکر ٹری جنرل اقوام متحدہ ،آئی پی یو دے سپیکرز تے سیکورٹی کونسل دے مستقل ارکان کوں خط لکھن تے ایں ایوان توں منظور تھیونڑ آلی قرارداد وی بھیجی ونجے ۔ملک دیاں ساریاں سیاسی جماعتاں کوں ہک آواز تھی تے ایں حوالے نال گالھ کرنڑیں چاہیدی ہے ۔ڈپٹی سپیکر وزیر قانون کوں ہدایت کیتی جو چوہدری نثار ولوں تجویز کوں عملی جامہ پواونڑ سانگے اپنڑاں کردار ادا کرن ۔