اسلام آباد ۔ 29 ستمبر (اے پی پی) صدر مملکت ممنون حسین ہشت گردی اتے انتہا پسندی دے ودھدے ہوئے خطرے نال نبڑ نڑ سانگے پاکستان تے بحرین وچال سیکورٹی انٹیلی جنس تعاون اچ ودھارے تے زور ڈتا ہے ۔صدر مملکت اے گالھ بحرین دے ایوان بالا شوری کونسل دے چیئر مین علی بن صالح نال گالھ مہاڑ کریندے ہوئیں آکھی جنہاں جمعے کوں اپنڑے وفد دے نال ایوان صدر اچ انہاں نال ملاقات کیتی ایںموقع تے چیئرمین سینیٹ رضا ربانی اتے سینیٹر حمداللہ سمیت اعلیٰ حکام وی موجود ہن۔ صدر مملکت آکھیا جو ڈوہیں ملکاں وچال تجارت دا حجم صلاحیت توں گھٹ ہے ایندے اچ مزید ودھارے تے توجہ ڈیونڑ دی ضرورت ہے ۔ایں سلسلے اچ پاکستان بحرینی سرمایہ کاراں دا خیر مقدم کریسی ۔انہاں آکھیا جو بحرینی سرمایہ کار توانائی انفراسٹرکچر دے شعبے اچ پاکستان اچ سرمایہ کاری دے موقع توں فائدہ چا سگدے ہن ۔صدر مملکت آکھیا پاکستانی ہنر منداں دے بحرین دی ترقی اچ اہم کردا ر ادا کیتا ہے ۔انہاں آکھیا جو اساں توقع کریندوں جو اساڈے ہنر مند اگی تے وی اپنڑاں مثبت تے مفید کردار ادا کریندے رہ ویسن ۔صدر مملکت زندگی دے مختلف شعبے اچ بحرین دے طالب علماں تے حکام کوں تعاون دی پیشکش وی کیتی ۔صدر مملکت زندگی دے مختلف شعبیں اچ ماہرین دے تبادلے تے آکھیا جو مستقبل اچ ایندے اچ مزید ودھارا کیتا ونجے تاں جو ڈوہیں ملکاں وچال سانجھے تجارتی تے صنعتی شعبے اچ سانجھے منصوبے شروع کیتے ونج سگن ۔صدر مملکت آکھیا جو چیئرمین سینیٹ رضا ربانی عالمی برادری خاص طور تے اسلامی ملکاں دے نال پاکستان دے چنگے تعلقات دے ودھارے سانگے وڈی محنت نال کم کریندے ہن جیرھا جو قابل تعریف ہے ۔بحرینی ایوان بالا دے چیئر مین چیئرمین علی بن صالح الصالح ایں موقع تے بحرین دے بادشاہ اتے ولی عہد ولوں صدر مملکت کوں نیک تمناواں دا سنھیا پجایا تے آکھیا جو ڈوہیں ملکاں وچال بہوں نیڑے تے برادرانہ تعلقات ہن ۔انہاں مزید آکھیا جو نرسنگ یونیورسٹی بحرین ولوں پاکستان سانگے ہک خصوصی تحفہ ہے جیں نال سانجھے تعاون اچ مزید وسعت پیدا تھیسی ۔انہاں ایں موقع تے پاک چین اقتصادی راہداری توں فائدے دی خواہش ظاہر کیتی ۔ انہاں آکھیا جو پاکستان بحرین ہی کائنی بلکہ پوری اسلامی دنیا سانگے بہوں اہم ملک ہے۔
