فاٹا کوں مرکزی دھارے اچ لاونڑ سانگے قانون سازی تے انتظامی انتظامی اقدامات تکھے کیتے ونجن، اصلاحات دا بنیادی مقصد فاٹا دے عوام دیاں زندگیاں کوں بہتر بنڑاونڑاں ہے
اسلام آباد ۔ 8 ستمبر (اے پی پی) وزیراعظم شاہد خاقان عباسی وزارت قانون و انصاف کو ںہدایت کیتی ہے جو وفاق دے زیر انتظام قبائلی علاقہ جات (فاٹا) کوں مرکزی دھارے اچ لاونڑ سانگے قانون سازی اتے انتظامی اقدامات تکھے کیتے ونجن تاں جو قبائلی علاقہ جات دے عوام کوں ملک دے بئے علاقیں وانگوں عوام دے برابر بنیادی حق تئیں رسائی حاصل تھی سگے ۔انہاں اے گالھ جمعے کوں فاٹا اصلاحات تے عملدرآمد بارے اچ قومی کمیٹی دے اعلیٰ سطحی اجلاس دی صدارت کریندے ہوئیں آکھی ۔ اجلاس اچ شریک کمیٹی دے بئے ارکان اچ چیف آف آرمی سٹاف جنرل قمر جاوید باجوہ، گورنر خیبرپختونخوا اقبال ظفر جھگڑا، وزیر اعلیٰ خیبرپختونخوا پرویز خٹک، وزیر سیفران لیفٹیننٹ جنرل (ر) عبدالقادر بلوچ، وزیر قانون و انصاف زاہد حامد، ڈپٹی چیئرمین پلاننگ کمیشن سرتاج عزیز اتے سینئر سول و عسکری حکام شامل ہن۔ کمیٹی فاٹا اصلاحات تے پارلیمنٹ اتے قبائلی علاقوں دے مثبت ردعمل تے اطمینان دا اظہار کیتا جیں دی منظوری کابینہ 2 مارچ کو ں ڈتی ہئی ۔ کمیٹی اصلاحات تے عملدرآمد دے عمل کوں تکھا کرنڑ سانگے وی فیصلے کیتے ۔ کمیٹی پولیس دی تیزی نال بھرتی اتے تربیت دے بعد پولیس امور کار دی انجام دہی سانگے وی کجھ تعداد اچ فرنٹیئر کانسٹیبلری دی ازسرنو تعیناتی دی منظوری ڈتی۔ عبوری مدت سانگے مناسب انتظامی نظام قائم کرنڑ دا وی فیصلہ کیتا گیا جڈاں جو عبوری عرصے سانگے چیف اپریٹنگ افیسر دے عہدے دی تخلیق دا وی فیصلہ کیتا گیا ۔ چیف آف آرمی سٹاف جنرل قمر جاوید باجوہ کمیٹی کوں گزریل سال دے دوران پورے فاٹا اچ ریاستی عملداری قائم تھیونڑ دے ھوالے نال حاصل تھیونڑ آلی کامیابی تے سیکورٹی اتے بارڈر انفراسٹرکچر کو ںتقویت ڈتے ونجنڑ سانگے چاتے ونجنڑ آلے اقدامات تے ترقیاتی کاوشاں بارے ڈسیا۔
