لاہور ۔ 25 ستمبر (اے پی پی) صدر مملکت ممنون حسین آکھیا ہے جو پاکستانی قوم، مسلح افواج اتے خاص طور تے پاک بحریہ قومی سلامتی کوں لاحق ہر قسم دے خطرے نال نبڑنڑ دی ودھ ساری صلاحیت رکھیندی ہے لیکن ایندے باوجود ضروری ہے جو خطے اچ جوہری پھیلاو، روایتی بحری قوت اچ ودھارے سانگے وڈے پیمانے تے کیتیاں ونجنڑ آلی سرمایہ کاری ، متعارف تھیونڑ آلی نت نویں ٹیکنالوجی اتے ایں طرح دے بئے روایتی تے غیر روایتی چیلنجاں نال آگاہی اتے ایندے نال نبڑنڑ سانگے پوری منصوبہ بندی تے چنگی صلاحیت دے حصول تے توجہ ڈتی ونجے ۔صدر مملکت اے گالھ لاہور اچ پاکستان نیوی کالج دے اہمتام نال منعقد میری ٹائم سیکوٹی ورکشاپ دے شرکاءتوں خطاب کریندے ہوئیں آکھی جیں اچ چیف آف نیول سٹاف ایڈمرل محمد ذکا اﷲ، کمانڈنٹ پاکستان نیوی وار کالج ریئر ایڈمرل معظم وی موجود ہن۔ ایں موقع تے ورکشاپ دے شرکا دی تیار کردہ میری ٹائم سکیورٹی پالیسی دی پریزینٹیشن وی ڈتی گی ۔ اے پریزینٹیشن سینیٹر سحر کامران، رکن پنجاب اسمبلی حسین جہانیاں گرزی اتے ریئر ایڈمرل شعیب ڈتی ۔ صدر مملکت آکھیا جو سمندری وسائل کوں چنگے طریقے نال استعمال اچ گھن تے قومی معیشت کو ںمستحکم کرنڑ دے نال بحری رستے دا وی تحفظ وی یقینی بنڑایا ونج سگدا ہے ۔ انہاں آکھیا جو میری ٹائم سیکورٹی ورکشاپ پاک چین اقتصادی راہداری دے حوالے نال وی وڈی اہمیت رکھیندی ہے جیرھی جو ہک ایجھی امید ہے جوجیں نال اقوامِ عالم اتے خاص طور تے ایں خطے دا سنہری مستقبل وابستہ ہے۔ صدر مملکت آکھیا جو اﷲ تعالیٰ پاکستان کوں بے پناہ وسائل تے نعمتاں نال سرفراز فرمایا ہے جیں اچ ہک سمندر وی ہے جیرھا جو ہک انمول خزینے دی حیثیت رکھیندا ہے۔ انہاں توقع ظاہر کیتی جو پاکستان دے سمندری وسائل بھرپور استفادہ دا ذریعہ بنڑسن ۔ صدر مملکت آکھیا جو پاک بحریہ میری ٹائم سیکٹر دی ترقی سانگے اپنڑے محدود وسائل دے باجود جیرھیاں بیش قیمت خدمات سر انجام ڈتیاں ہن ایندے تے او مبارخ دی مستحق ہے ۔
