چینی وزیر خارجہ دا دہشت گردی دی لعنت دے خلاف جنگ اچ پاکستان دی مسلسل تے پکی حمایت دا اعادہ
بین الاقوامی برادری انسداد دہشت گردی سانگے پاکستانی کوششاں دا اعتراف کرے
خواجہ آصف پاکستان دیاں قربانیاں دے اعتراف تے دہشت گردی دے خلاف جنگ اچ پاکستان دی غیر متزلزل حمایت تے چینی ہم منصب دا شکریہ ادا کیتا
بیجنگ ۔ 8 ستمبر (اے پی پی) چینی وزیر خارجہ وانگ ژی دہشت گردی دی لعنت دے خلاف جنگ اچ پاکستان دی مسلسل اتے پکی حمایت دا اعادہ کریندے ہوئیں آکھیا ہے جو ڈوہیں ملکاں خطے اچ امن سانگے سانجھیاں کاوشاں کریندے پن ۔وزیر خارجہ خواجہ محمد آصف دے نال اتھاں سٹیٹ گیسٹ ہاﺅس اچ سانجھی پریس کانفرنس توں خطاب کریندے ہوئیں انہاں آکھیا جو چین انسداد دہشت گردی سانگے پاکستان دیاں کاوشاں کوں منیندا ہے تے پاکستان دی خود مختاری تے علاقائی سالمیت دے تحفظ سانگے اپنڑی ” آہنی بھرا“ دی ودھ ساری حمایت کریندے ۔چینی وزیر خارجہ آکھیا جو پاک چین سدا بہار تعلقات تے پکے ہن ۔انہاں دا ملک پاکستان دی ترقی تے خوشحالی سانگے اپنڑاں کردار ادا کرینداں رہ ویسی ۔عالمی دہشت گردی دے خلاف جنگ اچ پاکستان کوں ہک اہم ملک قرار ڈیندے ہوئیں وانگ ژی دہشت گردی دے خلاف جنگ دے دوران پاکستان دیاں بے مثال قربانیاں کوں من گھدا تے بین الاقوامی برادری تے زور ڈتا جو او انسداد دہشت گردی سانگے پاکستانی کوششاں دا اعتراف کرے ۔افغانستان بارے انہاں آکھیا جو افغانستان اچ امن تے استحکام چین تے پاکستان ڈوہیں دے مفاد چ ہے اساں پاکستان تے افغانستان وچال چنگے رابطے چاہندوں ۔خواجہ محمد آصف پاکستان دیاں قربانیاں دے اعتراف اچ دہشت گردی دے خلاف جنگ اچ پاکستان دی غیر متزلزل حمایت تے چینی ہم منصب دا شکریہ ادا کیتا ۔انہاں پاک چین اقتصادی راہداری سانگے پاکستان دی ودھ ساری حمایت تے چین دا شکریہ ادا کیتا ۔انہاں آکھیا جو چین تے پاکستان وچال تاریخ ،سانجھے اعتماد ،برابری ،ہم آہنگی ،عدم مداخلت تے سماجی تے اقتصادی ترقی دے سانجھے ایجنڈے تے مبنی دوستانہ تعلقات استوار ہن ۔انہاں آکھیا جو پاکستان دی علاقائی سالمیت سانگے چین دی حمایت کوں بہوں اساں قدر دی نگاہ نال ڈیکھدوں ۔انہاں ون چائنہ پالیسی تے تائیوان ،، سنکیانگ، تبت اور بحیرہ ءجنوبی چین اچ چین دے مفادات سانگے پاکستان دی حمایت دا وی اعادہ کیتا ۔وزیر خارجہ آکھیا جو افغان مسئلے دا کوئی فوجی حل کائنی ۔اتھاں سیاسی حل دے ذریعے ہی امن تے استحکام لاتا ونج سگدا ہے ۔انہاں ڈسایا جو پاکستان افغانستان دے نال چنگے تعلقات سانگے کوششاں کریندا پیا ہے ۔بیجنگ آونڑ توں پہلے انہاں افغان ہم منصب نال ٹیلیفون تے گالھ کیتی ۔خواجہ آصف آکھیا جو امریکی صدر ڈونلڈ ٹرمپ دی افغانستان دے حوالے نال نظر ثانی شدہ پالیسی دے اعلان دے بعد ڈوہیں ہمسایہ ملکاں وچال اعلیٰ سطح دا پہلا رابطہ ہے ۔وزیر خارجہ پاک چین اقتصادی راہداری سانگے پوری سیکورٹی فراہم کرنڑ دے عزم دا اظہار کریندے ہوئیں آکھیا جو منصوبے سانگے کہیں قسم دے خطرے دے خلاف سخت اقدام کیتا ویسی ۔ایندے توں پہلے چینی وزیر خارجہ وانگ ژی سٹیٹ گیسٹ ہاﺅس آمد تے خواجہ محمد آصف تے انہاں دے وفد دا پر تپاک خیر مقدم کیتا ۔ڈوہیں رہنماواں ڈو پاسے تعلقات تے ابھر دے ہوئے چیلنج دے تناظر اچ علاقائی تے بین الاقوامی صورت حال تے ودھ سارے اتفاق رائے نال مفید تبادلہ خیال کیتا ۔وانگ ژی خواجہ آصف دا شکریہ ادا کریندے ہوئیں پاکستان سانگے چین دی مسلسل تے پکی حمایت دا اظہار کیتا ۔ قومی سلامتی دے مشیر لیفٹیننٹ جنرل (ر) ناصر خان جنجوعہ، پاکستان دے سفیر مسعود خالد اتے وزارت خارجہ دے سینئر حکام وی ایں موقع تے موجود ہن۔
