اسلام آباد ۔ 6 ستمبر (اے پی پی) کیپیٹل ایڈمنسٹریشن اینڈ ڈویلپمنٹ ڈویژن (کیڈ) وزیراعظم دے تعلیمی اصلاحات پروگرام دے تحت اجوکے تعلیمی سال دے دوران وفاقی دارالحکومت دے مزید 59 سرکاری سکولاں اچ مونٹیسوری کلاساں شروع کریسی ۔ گزریل سال مونٹیسوری کلاسز شروع کیتیاں گیاں جیں اچ ابتدائی طور تے 11 سرکاری سکولاں اچ مونٹیسوری کلاساں شروع کیتیاں گیاں ۔ 59 نویاں مونٹیسوری کلاساں دے نال اے تعداد 70 تھی ویسی ۔ وزارت کیڈ دی پارلیمانی سیکرٹری مائزہ حمید ”اے پی پی“ نال گالھ مہاڑ کریندے ہوئیں آکھیا جو سرکاری سکولاں اچ مونٹیسوری کلاساںدااجراءغیر سرکاری تنظیماں اتے نجی سکولاں دی معاون نال کیتا ویندا پیا ہے جیرھے جو مونٹیسوری کلاساں اچ تجربہ رکھیندے ہن۔ انہاں آکھیا جو نجی شعبے دی مدد نال اجوکے سال وفاقی دارالحکومت دے 66 سکولاں اچ مونٹیسوری سیکشنز قائم کر چکے ہوں۔ مائزہ حمید وزیراعظم تعلیمی اصلاحات پروگرام دی تفصیل ڈسیندے ہوئیں آکھیا جو مونٹیسوری کلاساںسانگے ہنڑ تئیں1460 طالباں دا داخلہ تھیا ہے ۔ مونٹیسوری کلاساں دے اجرادا مقصد ارلی چائلڈ ہڈ ایجوکیشن داودھار ہے تاں جو سرکاری سکولاں اچ وی نجی سکولاں جیہوجیہاں سہولتاں کوں یقینی بنڑایا ونج سگے اتے جیرھے طبقات سکولاں اچ مہانگی تعلیم برداشت کائنی کر سگدے ایہا سہولتاں سرکاری سہولتاں اچ ڈتیاں ونج سگن ۔
