راولپنڈی ۔ 02 اکتوبر (اے پی پی) بری فوج دے سربراہ جنرل قمر جاوید باجوہ کابل اچ افغانستان دے صدر اشرف غنی نال ملاقات کیتی جیں اچ ڈوطرفہ سانجھے امور تے غور تھیا ۔ پاک فوج دے شعبہ تعلقات عامہ (آئی ایس پی آر)دے مطابق بری فوج دے سربراہ جنرل قمر جاوید باجوہ کابل پجے تاں افغان آرمی چیف انہاں دا استقبال کیتا ۔پاک فوج دے سربراہ جنرل قمر جاوید باجوہ کوں گارڈ آف آنرپیش کیتا گیا ۔آرمی چیف جنرل قمر جاوید باجودہ افغانستان دے صدر اشرف غنی نال ون آن ون تے وفد دی سطح تے ملاقات کیتی ۔افغانستان دے صدر اشرف غنی ایں موقع تے آکھیا جو پاکستان تے افغانستان دوست ملک ہن تے ڈوہیں کوں پائیدار امن تے استحکام سانگے رل تے اگی تے ودھنڑاں ہوسی ۔ڈوہیں ملکاں خطے دی موجودہ سیکورٹی صورت حال تے ڈو پاسے تعلقات دی صورت حال دا جائزہ گھدا جڈاں جو پاک افغان تعلقات دے سارے پہلو تے گالھ مہاڑ کیتی گی ۔لمبی مدت دے امن متعلق سانجھے خطرے دے خلاف تعاون ،انسداد دہشت گردی تے غیر ریاستی عناصے دے حوالے نال انٹیلی جنس شیئرنگ ،تجارت تے عوامی رابطے متعلق امور تے گالھ بات کیتی گی ۔آرمی چیف جنرل قمر جاوید باجوہ افغانستان دی سیکورٹی فورسز دی دہشت گردی دے خلاف جنگ اچ سانجھے مفادات دے حصول سانگے تربیت تے استعداد کار ودھاونڑ سانگے پاکستان ولوں پورے تعاون دی پیشکش کیتی ۔ افغانستان دے دوئم نائب صدر‘ اول ڈپٹی چیف ایگزیکٹو آفیسر‘ دوئم ڈپٹی چیف ایگزیکٹو آفیسر‘ نیشنل سکیورٹی ایڈوائزر‘ این ڈی ایس دے چیف‘وزیر دفاع‘ وزیر داخلہ‘ افغان سفیر اتے افغان آرمی چیف وی اجلاس اچ موجود ہن جڈاں جو آرمی چیف جنرل قمر جاوید باجوہ دے نال وفد اچ سیکرٹری خارجہ امور‘ ڈی جی آئی ایس آئی اتے پاکستان دے سفیر شامل ہن۔
