اسلام آباد ۔ 30 اکتوبر (اے پی پی) صدر مملکت ممنون حسین آکھیا جو قومی ترقی تے معیشت دے استحکام سانگے معاشر ے دا ہر بندہ اپنڑی صلاحیت دے مطابق کم کرے ۔،وزیر اعظم یوتھ ووکیشنل پروگرام ایں سلسلے دی ہک کڑی ہے جیں دی کامیابی نال نینگر اپنڑیاں صلاحیتاں دے مطابق قومی ترقی دے عمل اچ چنگے طریقے نال شریک تھی سگسن ۔انہاں اے گالھ نیو ٹیک دی تقسیم انعامات دی تقریب توں خطاب کریندے ہوئیں آکھیا ۔تقریب توں وفاقی وزیر تعلیم و پیشہ ورانہ امور انجینئربلیغ الرحمن، ایگزیکٹو ڈائریکٹر نیوٹیک (NAVTTC) ذوالفقار احمد چیمہ وی خطاب کیتا ۔صدر مملکت بہترین کاکردگی دا مظاہر کرنڑ آلے نینگراں اچ انعام ونڈیے ۔صدر ممنون حسین آکھیا جو وزیراعظم یوتھ اسکل ڈیویلپمنٹ پروگرام دی تشکیل دا مقصد پاکستانی نوجواناں کوں انہاں دی صلاحیت دے مطابق تربیت تے روزگار دے ودھ سارے موقع ڈیونڑاں ہے ۔انھاں آکھیا جو جیرھے معاشرے جدید عہد دے تقاضیں کوں سمجھ تے افرادی قوت کوں تربیت ڈتی خوشحالی انہاں دا مقدر بنڑ گی ۔صدر مملکت ایں امر تے خوشی دا اظہار کیتا جو نیو ٹیک توں تربیت پاونڑ آلے نوجواناں دی ہک وڈی تعداد اندرلے ملک تے باہرلے ملک چنگے تے باعزت روزگار دے حصول اچ کامیاب تھی گی ہے ۔
