اسلام آباد ۔ 20 اکتوبر (اے پی پی) صدر مملکت ممنون حسین آکھیا ہے جو پاکستان ملائشیا ،اردن تے ویتنام دے نال بہوں چنگے تعلقات ہن تے پاکستان انہاں تعلقات اچ مزید ودھارا چاہندا ہے تاں جو انہاں ملکاں دے نال تجارتی ،سرمایہ کاری تے عوامی رابطے کوں وسعت ڈتی ونج سگے ۔ایوان صدر توں جمعے کوں جاری بیان دے مطابق اے گالھ انہاں ملائیشیا دے سبکدوش تھیونڑ آلے ہائی کمشنر ڈاکٹر حسرالثانی بن مجتبار، ویت نام دے سبکدوش تھیونڑ آلے سفیر نگوین ڑوین لو اتے پاکستان دے اردن اچ نامزد سفیرنال گالھ مہاڑ کریندے ہوئیں آکھی جنہاں ایوان صدر اچ انہاں نال انجھ انجھ ملاقاتاں کیتیاں ۔صدر مملکت آکھیا جو ملائشیا مختلف شعبے اچ شاندار ترقی کیتی ہے جیرھا جو بئے ملکاں سانگے مثال ہے ۔انہاں آکھیا جو پاکستان تے ملائشیا ہک ڈوجھے دے بہوں نیڑے ہن ۔صدر مملکت ایں امید دا اظہار کیتا جو ملائیشیا دے پاکستان سانگے نویں ہائی کمشنر وی سبکدوس تھیونڑ آلے وانگوں ڈوہیں ملکاں دے تعلقات بئے ودھاونڑ اچ اپنڑاں کردار ادا کریسن ۔ صدر مملکت آکھیا جو ویتنام دے سبکدوش تھیونڑ آلے سفیر نگوین ڑوین لو پاکستا ن اچ بہترین خدمات سر انجام ڈتیاں ہن ۔ صدر مملکت ایں امید دا اظہارکیتا جو ویتنام دے سبکدوش تھیونڑ آلے سفیر پاکستان توں خوشگوار یاداں گھن تے ویندے پے ہن ۔انہاں آکھیا جو ویتنام اپنڑے افسراں دی تربیت سانگے پاکستان دے تربیتی اداریں توں مستفید تھی سگدا ہے ۔ صدر مملکت نال پاکستان دے اردن اچ نامزدتھیونڑ آلے سفیر میجر جنرل (ر) جنید رحمت وی ملاقات کیتی۔ انہاں آکھیا جو پاک اردن تعلقات اچ مزید ودھارے دی ضرورت ہے ۔ انہاں ایں امید دا اظہار کیتا جو میجر جنرل (ر) جنید رحمت نویاں ذمے واریاں چنگے طریقے نال نبھا گھنسن ۔ صدر مملکت نامزد سفیر کوں اردن اچ رہنڑ آلے پاکستانیاں دی فلاح تے بہبود سانگے اقدامات کرنڑ دی وی ہدایت کیتی ۔
