قانونی موشگافیاں دے ذریعے عوامی مینڈیٹ دی توہین نہ کیتی ونجے، حق حاکمیت عوام دی مقدس امانت ہے، ایندے اچ خیانت دا سلسلہ بند تھیونڑاں چاہیدا ہے ، 2013دے مقابلے اچ 2018اچ مسلم لیگ (ن) کو ں وڈی کامیابی مل ویسی
اسلام آباد ۔ 03 اکتوبر (اے پی پی) مسلم لیگ (ن) دے نویںمنتخب صدر سابق وزیراعظم محمد نواز شریف آکھیا ہے جو قانونی موشگافیاں دے ذریعے عوامی مینڈیٹ دی توہین نہ کیتی ونجے، حق حاکمیت عوام دی مقدس امانت ہے، ایندے اچ خیانت دا سلسلہ بند تھیونڑاں چاہیدا ہے،عوام دا حق حکمرانی بحال کرنڑ سانگے گرینڈ نیشنل ڈائیلاگ کیتا ونجے ۔ملک تے ایندی 20کروڑ عوام دی خاطر اساں نفرتاں ،الزام تے تصادم دے کلچر دا خاتمہ کرنڑاں ہوسی ،ملک توں اندھارے مکدے پن ،لوڈشیڈنگ ختم تھیونڑ آلی ہے ،اساں سانگے اطمینان دی گالھ ہے جو ملک دے عوام اساڈے نال ہن ،2013دے مقابلے اچ 2018اچ مسلم لیگ ن کوں وڈی کامیابی مل ویسی ۔ انہاں خیالاں دا اظہار انہاں منگل کوں کنونشن سینٹر اچ پارٹی صدر منتخب تھیونڑ دے بعد مسلم لیگ ن دی جنرل کونسل دے اجلاس توں خطاب کریندے ہوئیں کیتا ۔نواز شریف آکھیا جو خواجہ سعد رفیق آکھیا ہے جو ولا ولا نوازشریف کوں سیاست توں بے دخل کرنڑ دی کوشش کیتی ویندی ہے ۔میں دل اچ سوچیندا ہم جو میں وی کیا چیز ہاں میکوں ولا ولا سیاست تے بے دخل کرنڑ دی کوشش کیتی گی تے تساں میکوں ولا سیاست اچ داخل کر ڈتا ۔انہاں آکھیا جو کاوڑ میکوں وی ہے میں منافقت نی کریندا اے اصول میڈا ہی نی پوری جنرل کونسل تے اساڈے ہک ہک کارکن دا ہوونڑاں چاہیدا ہے ،ایں اصول تے چل تے اساں اپنڑی منزل حاصل کر گھنسوں ،ایں اصول تے چلسوں تاں اللہ سئیں فتح ڈیسی ۔نواز شریف آکھیاجو اے قانون ایوب خان تے ولا پر ویز مشرف بنڑایا جیں کوں اساں اج واپس لوٹایا ہے ۔اساں سینٹ تے قومی اسمبلی دے انہاں سارے ارکاناں کوں خراج تحسین پیش کریندوں جنہاں اے قانون سازی کیتی ہے ۔انہاں آکھیا جو تساں ولا طاقت دے نال نواز شریف کوں واپس گھدی آندو ،اساں پورے خلوص نال تے بغیر لالچ دے ملک دی خدمت کیتی ہے کوئی غلط کم نی کیتا ۔میکوں نا اہل کرنڑ دی وجہ تساں بہتر جانڑدو ۔انہاں آکھیا جو تاریخ ڈسیندی ہے جو مسلم لیگ آزادی دی جنگ کیجھی مشکل نال لڑی تے جتی ۔پاکستان ہک عظیم قوت بنڑ تے ابھریا ۔اساں آزادی دی 70ویں سالگرہ 14اگست کوں منائی ۔انہاں آکھیا جو پاکستان دنیا دی ستویں ایٹمی طاقت ہے ہک مضبوط تے توانا ملک دی حیثیت نال قائم ہے ۔تساں ڈٹھا ہے جو جیرھے ملک کوں ایٹمی طاقت بنڑیندے ہن انہاں دے نال کیا سلوک تھیندا ہے ،پھاسی ڈتی ویندی ہے ہتھکڑیاں لاتیاں ویندیاں ہن تے جلاوطن کر ڈتا ویندے ۔انہاں آکھیا جو انہاں کوں پانامہ اچ کجھ نہ ملیا تاں اقامہ اچ نا اہل کر ڈتا ۔انہاں کوں قوم کوں سچ ڈساونڑاں چاہیدا ہے جو نواز شریف دے خلاف پانامہ اچ کجھ نی ملیا ،ایندی کرپشن تے خرد برد دا کوئی کیس نی ملیا انہاں کوں اے وی ڈساونڑاں چاہیدا ہے جو اساکوں نا اہل کرنڑ دا ہکو رستہ اقامہ ہے ۔اے کھیڈ تماشہ 70سالاں توں چلدا پیا ہے ۔انہاں آکھیا جو تاریخ اساکوں سمجیندی پئی ہے جو اگر ایں بے ڈھنگی چال کوں نہ بدلیا تاں حالات بدلنڑ دی کوشش نہ کیتی تاں پاکستان اساکوں معاف کائناں کریسی ۔ انہاں آکھیا جو اساں سانگے اطمینان دی گاھ ہے جو ملک دے عوام اساڈے نال ہن ۔میکوں یقین ہے جو 2013دے مقابلے اچ 2018اچ مسلم لیگ ن کوں وڈی کامیابی مل ویسی ۔
