مری ۔ 05 اکتوبر (اے پی پی) وزیراعظم شاہد خاقان عباسی ’ جمہوریت دے استحکام کوں اولین ترجیح قرار ڈیندیں ہوئیں آکھیا جو جمہوری اقدار دی مضبوطی دے ذرےعے قوم کوں درپیش مسئلے حل کیتے ونج سگدن،پاکستان دہشت گردی دے خلاف ساریاں توں وڈ ی جنگ لڑدا پئے جئیں سانگے ہزاراں قربانیاں ڈتیاں گئن۔او خمیس کوں لارنس کالج گھوڑا گلی مری دے 157 ویں یوم تاسیس دے موقع تے خطاب کریندے پئے ہن۔تقریب اچ گورنر پنجاب محمد رفیق رجوانہ وی موجود ہن ۔وزیراعظم کالج اچ مختلف ترقیاتی کماں سانگے 20کروڑ روپے دے فنڈز دا وی اعلان کیتا۔انہاں آکھیا جو کالج انتظامیہ استادیں دی فلاح و بہبود سانگے فنڈز قائم کرے جئیں اچ حکومت وی مدد کریسی۔انہاں آکھیا جو اج ملک کوں مختلف مسئلے درپیش ہن پر اللہ دا کرم اے جو اساڈا شمار دنیا دے انہاں ملکاں اچ تھیندے جئیں کوں دنیا اچ عزت اتے وقار دی نظر نال ڈٹھا ویندے۔انہاں آکھیا جو پاکستان ہک ایٹمی ملک اے اتے اساں آپنڑی محنت نال اے طاقت حاصل کیتی اے اساں ملک دا دفاع کرنڑ جانڑدوں۔
