سکردو ۔ 25 اکتوبر (اے پی پی) وزیر اعظم شاہد خاقان عباسی کوں بدھ کوں اتھاں نیشنل ہائی وے اتھارٹی دے چیئرمین شاہد اشرف تارڑ گلگت سکردوجگلوٹ روڈ اتے شمالی علاقہ جات اچ شاہرات دے بئے منصوبیں تے بریفنگ ڈتی گی ۔ایں موقع تے گورنر گلگت بلتستان میر غضنفر علی اتے وزیر اعلیٰ حافظ حفیظ الرحمن ، گلگت بلتستان کونسل دے ارکان ، وفاقی وزیرمواصلات حافظ عبدالکریم، وزیر مملکت مواصلات جنید انوارچوہدری، امور کشمیر تے گلگت بلتستان دے وفاقی وزیر چوہدری برجیس طاہر وی موجود ہن۔ چیئرمین این ایچ اے بریفنگ ڈیندے ہوئیں ڈسایا جو جگلوٹ سکردو روڈ تے باقاعدہ کم دا آغاز تھی گیا ہے انہاں یقین ڈیوایا جو اے سڑک اپنڑی مقررہ مدت اچ پوری تھی ویسی ۔ انہاں شمالی علاقہ جات بالخصوص گلگت بلتستان اچ شاہرات دے مختلف بئے منصوبیں تے وی وشنی پاتی ۔چیئرمین این ایچ اے آکھیا جو 164 کلومیٹر طویل گلگت سکردو روڈ 31ارب روپے دی لاگت نال تعمیر کیتی ویسی اے جون 2020تئیں پوری تھی ویسی تاں جو اساڈی کوشش ہے جو دسمبر 2019تئیں ایں منصوبے کوں پور ا کر گھدا ونجے ۔انہاں ڈسایا جو سڑکاں تے گاڈیاں دی رفتار کوں برقرار رکھنڑ سانگے 5سرنگاں دا ودھارا کیتا گیا ہے ،سڑک دی تعمیر دے منصوبے تے 5پل بنڑائے ویسن ،اے جدید ڈیلٹا پل ہن انہاں تے ہر ویلھے ڈو لائن پیدل چلنڑ آلیں دی وی جاہ ہوسی ۔
