اسلام آباد ۔ 29 نومبر (اے پی پی) قومی احتساب بیورو دے چیئرمین جسٹس جاوید اقبال آکھیے جو بدعنوانی ہک لعنت اے جیکوں مکاونڑ کیتے کوشش کرنڑ جہاد دے برابر اے، برائی مضبوط ضرور تیھندی اے بھل چوراں اتے بدعنواناں دے پیر نئین ہوندے کیوں جو جیت ہمیشہ سچ دی ہی تھیندی اے۔ نیب ملک توں بد عنوانی مکاونڑ کیتے ہینڑے لوکاں تے ہتھ پاونڑ دی بجائے وڈیاں مچھیاں دے خلاف قانون دے مطابق کارروائی کرنڑدا عزم رکھیندے۔ 179 میگا کرپشن مقدمیاں اچ 96 تے ریفرنسز متعلقہ عدالتاں اچ دائر تھی چکین جڈاں جو بئے کرپشن دے وڈے مقدمیاں کو تیکھے قانون دے مطابق توڑ پجایا ویسی۔اے گالھیں انہاں نیب ہیڈ کوارٹرز اسلام آباد اچ بدعنوانی دے مقدمیاں دے متاثرین کوں انہاں دے پیسے ولا ڈیونر دی تقریب ویلھے آپنڑے خطاب اچ کیتن۔انہاں آکھیے جو نیب دا ہتھ ہنڑاتے توں ہیٹھ ودھسی کیوںجوایں ویلھے ملک اچ عوام مختلف نجی اتے کوآپریٹو ہاﺅسنگ سوسائیٹیاں اچ ارباں روپے دی جمع پونجی نال سرمایہ کاری کیتی بیٹھین بھل انہاں کو نہ تاں ویلھے اتے جاہ تے ترتیب دے مطابق پلاٹ ملین اتے نہ ہی پیسے ولا ملین جیں پاروں غریب عوام ، سرکاری پنشنرز ، بیوائیں اتے یتیم لوک سالاں توں آپنڑے جائز حق کیتے در در دے دھکے کھاندے ودین۔ قومی احتساب بیورودا چیئرمین ہوونڑ پاروں میں آپنڑے پہلے خطاب اچ یقین ڈیوایا ہئی جو نیب دے سارے وسائل غیر قانونی ہاﺅسنگ اتے کوآپریٹوہاﺅسنگ سوسائٹیاں دے متاثرین دے پیسے تیکھے توں تیکھے ولا ڈیوانڑ کیتے استعمال کیتے ویسن۔انہاں آکھیے جو میکوں اے ڈسیندے ہوئیں خوشی تھیندی پئی اے جو اج نیب 9ہاﺅسنگ سوسائٹیاں دے 175 متاثرین کوں انہاں دی لٹی گئی جمع پونجی ولا ڈیوا تے آپنڑا وعدہ وفا کیتے بھل منزل حالی بہوں پرین کھڑی اے اتے اساں آپنڑا فرض نسے بھلیے۔انہاں آکھیے جو میڈی عوام توں درخواست اے جو او آپنڑی سرمایہ کاری سوچ سمجھ تے قانونی طریقے نال کم کرنڑ آلیاں نجی کوآپریٹو ہاﺅسنگ سوسائیٹیاں اچ کرن۔ انہاں آکھیے جو احتساب ساریاں کیتے دی پالیسی تے سختی نال عمل کیتا ویسی، ہنر نیب اچ صرف کم، کم اتے کم ہی ہوسی۔ایں موقعے تے ڈپٹی چیئرمین نیب امتیاز تاجوراتے ڈی جی راولپنڈی سودھے بئے سینئر افسران وی موجودہن۔
