اسلام آباد ۔ 8 نومبر (اے پی پی) صدر مملکت ممنون حسین آکھیا ہے جو جلال آباد اچ پاکستانی سفارتکار دا بے رحمانہ قتل افسوسناک ہے، افغانستان کوں سفارتکاراں دی حفاظت اتے علاقائی امن و استحکام سانگے اپنڑیاں ذمے واریاں چنگے طریقے نال ادا کرنڑیاں چاہیدیاں ہن ، پاکستان ایں سلسلے اچ اپنڑے برادر ملک نال ودھ سارا تعاون کریسی ۔صدر مملکت اے گالھ ایوان صدر اچ 107ویں نیشنل مینجمنٹ کورس دے شرکا نال خطاب کریندے ہوئیں آکھی ۔ایں موقع تے ریکٹر، نیشنل سکول آف پبلک پالیسی عظمت علی رانجھا اتے سیکرٹری اسٹیبلشمنٹ اسد حیاءالدین دے علاوہ بئے اعلیٰ حکام وی موجود ہن ۔ صدر مملکت آکھیا جو پاکستان افغانستان اچ امن تے ترقی چاہندا ہے ۔ایں سلسلے اچ افغانستان کوں پاکستان تے اعتماد کرنڑاں ہوسی ،میکوں یقین ہے جو افغانستان مستقبل اچ پاکستان دا نیڑے دا یار ہوسی ۔صدر مملکت آکھیا جو جمہوریت دے استحکام سانگے آئین اساکوں غیر مبہم رہنمائی ڈیندا ہے جیں دے ذریعے عوام کوں اپنڑے ضمیر دے مطابق صلاح دے اظہار تے اپنڑی خواہشات دے مطابق آزادانہ غیر جانبدارانہ انتخاب دے ذریعے حکومت دا حق ڈتا ہے ۔حال اچ ہی حکومت انتخابی عمل کوں بہتر بنڑاونڑ سانگے اصلاحات دی منظوری وی ڈتی جیں نال نظام اچ بہتری آسی ۔ صدر مملکت آکھیا جو پاک چین اقتصادی راہداری دی منصوبہ بندی اچ وفاق دے علاوہ سارے صوبائی حکومتاں تے متعلقہ ادارے شامل ہن ۔ایں منصوبے تے عمل در آمد سانگے بلوچستان دے عوام تے تاجر برادری دی فعال نمائندگی موجود ہے ۔انھاں آکھیا جو سی پیک روٹ اچ کوئی تبدیلی کائناں کیتی ویسی ۔ایں منصوبے نال بلوچستان کوں فائدہ تھیسی ۔
