وزیراعظم شاہد خاقان عباسی دی صدارت اچ مشترک مفادات کونسل دا اجلاس

اسلام آباد۔ 24 نومبر (اے پی پی) مشترکہ مفادات کونسل (سی سی آئی) ملک اچ ہکوجیہے اتے معیارتی تعلیم نظام سانگے قومی ٹاسک فورس بنڑاونڑ دا فیصلہ کیتے جڈانجو پٹرولیم ایکسپلوریشن اینڈ پروڈکشن پالیسی 2012ءاچ ترمیم دی تجویز دی وی منظوری ڈتی،سی سی آئی فیصلہ کیتے جو گیس فیلڈز دی قریبی آبادیاں تے دیہات کوں گیس دی فراہمی بارے سارے خرچے تقسیم کار کمپنیاں برداشت کریسن،مردم شماری دے اعدادوشمار دی تھرڈ پارٹی توثیق دے عمل کوں مختصر ترین مدت اچ پورا کرنڑ د ی کوشش کیتی ویسی،بجلی دی پیداور،تقسیم کار کمپنیاں سانگے تخصیص اتے صوبیاں ولوں لوڈشیڈنگ دا دورانیہ ہکے ویلھے مانیٹرنگ کیتی ویسی جڈانجو ایہو طریقہ کار گیس دے شعبے سانگے وی اختیار کیتا ویسی۔ مشترکہ مفادات کونسل دا اجلاس وزیراعظم شاہد خاقان عباسی دی صدارت اچ جمعہ کوں پی ایم آفس اچ تھیا۔اجلاس 18ویں آئینی ترمیم دے تناظر اچ ہائیر ایجوکیشن کمیشن اتے ایجھے بئے اداریاں دے معاملیاں بارے جائزہ گھنڑ دے بعد ملک اچ قومی ٹاسک فورس برائے تعلیمی معیارات بنڑاونڑ دا فیصلہ کیتے۔اے ٹاسک فورس نصاب اتے ذریعہ تعلیم بارے معاملیاں دا جائزہ گھنسی اتے ملک اچ ہکوجیہے نظام تعلیم سانگے آپنڑی سفارشات ڈیسی۔