اسلام آباد ۔ 27 نومبر (اے پی پی) قومی احتساب بیورو دے چیئرمین نیب جسٹس جاوید اقبال آکھیا ہے جو پاکستان اچ کم کرنڑ آلیاں موبائل فون کمپنیاں مبینہ طور تے رپورٹس دے مطابق حکومت پاکستان کوں تقریباً400 ارب روپے داسالانہ ٹیکس ادانی کریندیاں جیں دی وجہ توں قومی خزانے اچ ہر سال تقریباً 400 ارب روپے جمع کائنی کروایا ویندا پیا بلکہ فیڈرل بورڈ آف ریونیو(ایف بی آر) دی کارکردگی خصوصاًٹیکس وصولی دے نظام اچ مزید بہتری دی ضرورت ہے ۔ انہاں آکھیا جو پاکستان باہرلی سرمایہ کاری سانگے بہترین ملک ہے مگر اساںاپنڑے قومی مفادات دے تحفظ سانگے قانون دے مطابق ٹیکس وصول کرنڑ سانگے ہر ممکن اقدامات کرنڑیں چاہیدن۔انہاں آکھیا جو نیب دے 7علاقائی بیوروز ہن جیں دے انچارج متعلقہ ڈائریکٹر جنرلز ہن جنہاں کوں ہدایات جاری کیتیاں گیاں ہن جو ایں گالھ کوں یقینی بنڑاون جو عوام دی بد عنوانی متعلقہ ساریاں شکایتاں دا نہ صرف قانون دے مطابق ازالہ کیتا ونجے بلکہ شکایات کرنڑ آلیں کوں انہاں دی شکایت متعلق وختی ڈسایا ویندا پے ۔ہک واری قانون دے مطابق انکوائری/انویسٹی گیشن تھیونڑ دے بعد قانون دے برخلاف کھولنڑ تے کہیں بے گناہ کوںولا ولا نیب اچ سڈنڑ تے مبینہ طور تے ہراساں کرنڑ آلیں دے خلاف قانون دے مطابق کاروائی عمل اچ لاتی ویسی ۔
