سپیکر قومی اسمبلی ایاز صادق نال ایرانی سپیکر ڈاکٹر علی لاریجانی دی ملاقات

اسلام آباد ۔ 25 دسمبر (اے پی پی)چھ ملکی سپیکرز کانفرنس اچ آونڑ آلے اسلامی جمہوریہ ایران دی مشاروتی اسمبلی دے سپیکر ڈاکٹر علی لاریجانی پارلیمانی وفد نال سپیکر قومی اسمبلی سردار ایاز صادق نال ملاقات کیتی، خطے دی صورتحال اتے ڈو طرفہ معاملایں خاص کر پارلیمانی سطح تے رابطے ودھاونڑ دیاں کوششاں تے گالھ مہاڑ کیتی۔ سپیکر قومی اسمبلی سردار ایاز صادق آکھیے جو ڈوہیں ملک سانجھے مذہب،تاریخ و ثقافت دے رشتیاں اچ بدھیے ہوئین،ڈوہیں دے دوست اتے دشمن وی ہک ہین، ڈوہان ملکاں وچال چنگے تعلقات خطے اچ امن، سکیورٹی اتے خوشحالی کیتے ضروری ہن۔انہاں مسلم امہ دے مسائل دے حل کیتے ڈوہاں ملکاں دے گانڈھے کوں اہم قرار ڈتے۔ ایرانی سپیکر سپیکرز کانفرنس دے شاندار انتظامات اتے سپیکر قومی اسمبلی دی کوششاں دی تعریف کیتی۔ایرانی سفیرآکھیا جو کانفرنس رکن ملکاں وچال رابطیاں کوں ودھاونڑ اتے دہشتگردی چیلنج مُکاونڑ کیتے اہم کردار ادا کریسی۔ڈاکٹر علی لاریجانی سپیکر کوں آندے سال تہران اچ تھیونڑ آلی او آئی سی ممبرملکاں دی پارلیمانی یونین اچ شرکت دی دعوت ڈتی۔