اسلام آباد ۔ 07 دسمبر (اے پی پی) مقبوضہ بیت المقدس کو اسرائیل دا دارالحکومت منڑ دے حوالے امریکی صدر دے اعلان تے عالم اسلام، یورپ ، اقوام متحدہ دے نال نال پوری دنیا اچ تشویش دا اظہار کیتا وایندا پئے، حرمین شریفین انتظامیہ دے سربراہ اتے مکہ اچ حرم پاک دے امام اتے خطیب شیخ ڈاکٹر عبد الرحمن السدیس ہی نئیں پوپ فرانسس وی ایں فیصلے کو متنازعہ اتے فساد کھنڈاونڑ دی پاڑ قرار ڈتے۔ عالمی میڈیا موجب امریکی صدر ڈونلڈ ٹرمپ ولوں مقبوضہ بیت المقدس کو ں اسرائیل دا دار الحکومت منڑ اتے امریکا دا سفارتخانہ تل ابیب توں مقبوضہ بیت المقدس گھن ونجنڑ دے اعلان کوں انتہائی متنازعہ اتے قابل تشویش قرار ڈتا ویندا پئے۔ عالم اسلام اچ ایں فیصلے تے بہوں کاوڑ ڈتھی ویندی پئی اے۔حرمین شریفین انتظامیہ دے سربراہ اتے مکہ اچ حرم پاک دے امام تے خطیب شیخ ڈاکٹر عبد الرحمن السدیس آکھیے جو بیت المقدس مسلماناں داپہلا قبلہ اتے تریجھا حرم شریف اے جیندی سنجانڑ قیامت تئیں راہسی۔ مسئلہ فلسطین اتے بیت المقدس دے حوالے نال سعودی عرب دا اصولی موقف ہے جنہاں ہمیشہ قضیہ قدس دی حمایت کیتی ہے۔ ترکی ایں غیر ذمہ دارانہ اتے غیر قنونی اعلان دی مذمت کیتی ہے۔ ترک وزیر خارجہ آکھیے جو اسرائیل اتے فلسطین وچال تنازعہ صرف فلسطینی ریاست بنڑن نال ہی حل تھیسی جیندا دارالحکومت مشرقی بیت المقدس ہے۔ایں فیصلے نال خطے اچ امن کوں بہوں نقصان پجنڑ دا خطرہ پیدا تھی گئے۔ ترک صدر رجب طیب اردوان ایں مسئلے تے 13 دسمبر کوں استنبول اچ اسلامی تعاون تنظیم دا سربراہ اجلاس وی سڈ گھدے ۔اڈو ایران وی فیصلے دی مذمت کریندے ہوئیں ایکوں نویں فساد دا منڈھ قرار ڈتے۔ فلسطینی صدر محمود عباس آکھیے جو ایں اعلان توں بعد امریکا امن عمل اچ کوئی کردار ادا کائناں کرسگسی۔ ایں ویلھے مشرق وسطی اچ امن کوششاں دا تے لگ گین۔ پوپ فرانسس وی فیصلے تے خوش کائنی ۔ آہدن جو مقبوضہ بیت المقدس مسلماناں، عیسائیاں اتے یہودیاں ساریاں کیتے مقدس شہرہے۔ ایں معاملے وچ حکمت تے دانائی نال کم کرنڑ چاہیدے تاں جوکوئی نواں فساد نہ کھڑا تھی ونجے۔ڈوجھے پاسو اقوام متحدہ دے سیکرٹری جنرل انتونیو گوئٹرس آکھیا ہے جو اسرائیل تے فلسطین وچال ڈو ریاستی حل دا کوئی متبادل کائنی۔ مقبوضہ بیت المقدس دی حیثیت دا تعین صرف اسرائیل تے فلسطین وچال امن مذاکرات دے ذریعے کیتا ونجنڑاچاہیدے۔ فرانسیسی صدر ایمینﺅل میکرون ایں فیصلے تے ڈکھ دا اظہار کیتے۔ انہاں تشدد دی بجائے مذاکرات کوں ترجیح ڈیونڑ تے زور ڈتے۔یورپی یونین دے اعلیٰ سفارتکار فیڈریکا موگرینی وی تشویش ظاہر کیتی اے۔
