اسلام آباد ۔ 24 دسمبر (اے پی پی) وزیر اعظم شاہد خاقان عباسی آکھیے جو قائد اعظم محمد علی جناح داجمنڑ ڈینہہ بحثیت ِقوم انفرادی اتے اجتماعی طورتے، خصوصی اہمیت دا حامل اے کیوں جو اج دا ڈینہہ جتھاں اپنڑے عظیم قائد کوں خراجِ عقیدت پیش کرنڑ دا موقع ڈیندے اتھائیں انہاں دے افکار و سوچ کوںتازہ کرنڑ اتے ایں نظریے کوںبنیاد بنڑا تے اگو تے ودھنڑ دا عزم وی ڈویندے۔قائد اعظم دے جمنڑ ڈینہہ دے موقعے تے اپنڑے سنیہڑے اچ وزیر اعظم شاہد خاقان عباسی آکھیے جو قائدِ اعظم محمد علی جناحؒ ساری حیاتی ٹھوس دلائل اتے جمہوری اصولاںدی بنیاد تے مسلمانانِ ہند دے مذہبی، سماجی اتے اقتصادی حقوق اتے تشخص دا مقدمہ لڑیے، برصغیر پاک و ہند اچ انگریز دے تسلط اتے ہندو سامراج دی سازشاں دا شکار بنڑنڑ آلی مسلمان قوم کوں قائداعظم نہ صرف مسلم لیگ دے پلیٹ فارم تے کٹھا کیتے بھل اپنڑی جمہوری جدو جہد دے نتیجے ہک اینجھی ریاست دی تشکیل ممکن بنڑائی جتھاں رنگ ونسل، مذہبی، لسانی اتے بئے کہیں وانجھ توں بغیر ہر شہری کوں برابر حقوق ہوون۔قائد اعظم یاست دے بنیادی اصولاں دے نال نال نویں مملکت دے لوکاں کیتے ” اتحاد ،ایمان اتے تنظیم” دے رہنماءاصول بنڑائین۔انہاں آکھیے جو اج اینجھے قائد دا جمنڑ ڈینہہ منیندے ہوئیں ساکوں جائزہ گھنڑا چاہیدے جو اساں اپنڑے قائد دے اصولاں اتے عظیم مقصد کوں ودھاونڑ اچ کتنے کامیاب رہے ہیں۔انہاں آکھیے جو ساکوں ماضی توں سبق سکھدے ہوئیں منزل دے حصول کیتے جدوجہد کرنڑی ہوسی۔شاہدخاقان عباسی آکھیے جو محنت، سچائی ، دیا نتداری ،بے لوث جد وجہداتے جمہوری اقداردی پاسداری قائددی حیاتی دے کجھ اینجھے اصول ہن جیندے تے چلدے ہوئے اساں ملک اتے قوم کوں درپیش مسئلیاں توں کڈھ سگدے ہیں اتے ملک کوں مضبوط اتے مستحکم پاکستان بنڑا سگدے ہیں۔آو! اساں رل مل تے اپنڑے قائد دے افکار و خیالات دے سوجھلے اچ ہک مضبوط اتے ترقی یافتہ پاکستان کیتے جدوجہد کروں۔
