اسلام آباد ۔ 24 دسمبر (اے پی پی) صدر مملکت ممنون حسین قائد اعظم ؒ دے جمنڑ ڈینہہ تے بانی پاکستان کوں زبردست خراج تحسینپیش کریندے ہوئیں آکھیے جو اج مختلف شعبیاں اچ درپیش اوکھ تے قائداعظم دے فرمان دے سوجھلے اچ قانون اتے آئین تے عمل درآمد دے ذریعے قابوپاتا ونج سگدے، قائد اعظم دے افکاراتے تعلیمات تے صدق دل نال عمل اقتصادی استحکا م اتے ترقی وخوشحالی دا خواب شرمندہ تعبیرکیتا ونج سگدے،قوم ہر قسم دے سیاسی اتے غیر سیاسی جھیڑیاں کوں ہک پاسے سٹ تے ترقی و خوشحالی دے عظیم مقصد کیتے ہک مٹھ تھی ونجے۔قوم دے ناویں اپنڑے سنیہڑے اچ صدر مملکت ممنون حسین د آکھنڑ ہا جو پاکستانی قوم اج قائداعظم محمد علی جناحؒدا جمنڑ منیندی پئی اے،میڈے خیال اچ بانی پاکستان دی تعلیمات اتے انہاں دے فرمان دی اہمیت ہر گذردے ڈینہہ دے نال ودھدی ویندی اے۔قومی تاریخ ڈسیندی اے جو بابائے قوم دیاں دور اندیش سوچاں اتے سیاسی بصیرت آونڑ آلے ویلھے دا اندازہ کرگھدا ہا اتے قوم کیتے اتحاد ایمان، تنظیم جھیں اصول ڈتن۔اج ،وقع اے جو قومی حالات دا جائزہ گھدا ونجے اتے قوم جیہڑے مسائل اچ پھسی ہوئی اے ایندی وڈی وجہ قائد دے فرمودات کوں بھلنڑ اے۔انہاں افسوس کیتے جو اساں بانیان پاکستان دا سبق بھل چکے ہیں،جیندی وجہ توں اج اے ڈینہہ ڈیکھنڑے پن۔اج دے مسئلیاں تے قانون اتے آئین تے عمل درآمدنال قابو پاتے اقتصادی استحکا م، ترقی وخوشحالی دا خواب شرمندہ تعبیرکیتا ونج سگدے۔ایں سانگے ساکوں ہر قسم دے جھیڑے جھگڑے ہک پاسے رکھ تے ترقی و خوشحالی دے عظیم مقصد کیتے ہک مٹھ تھیونڑاں ہوسی۔انہاں آکھیے جو بابائے قوم کوں خراج عقیدت پیش کرنڑ دا ایہو طریقہ اے جو انہاں دے افکار تے عمل کریندے ہوئیں مادر وطن کیتے کہیں قربانی توں پچھو نہ ہٹوں۔انہاں دعا کیتی جو اللہ تعالیٰ ساکوں قائد اعظم دے نقشِ قدم تے چل تے وطنِ عزیز دی تعمیر و ترقی کیتے کم کرنڑ دی توفیق ڈیوے۔
