معاشرے دا ہر بندہ د دل و جان نال اے من گھنے جو ایندی قسمت دا فیصلہ صرف ووٹ دے ذریعے ہی تھی سگدے،صدر مملکت ممنون حسین

اسلام آباد ۔ 7 دسمبر (اے پی پی) صدر مملکت ممنون حسین آکھیا ہے جو معاشرے دا ہر بندہ دلوں اے من گھنے جو ایندی قسمت دا فیصلہ صرف ووٹ دے ذریعے ہی تھی سگدا ہے ،ایں سانگے ضروری ہے جو انتخابی نظام کوں فعال تے تکھی رفتار تے شفاف بنڑاونڑ دے علاوہ بالاں دے ذہناں اچ ابتدائی عمر توں ہی ووٹ دا تقدس نقش کر ڈتا ونجے ،ایں مقصد سانگے اگر تعلیمی نصاب توں مدد گھننڑ دی ضرورت ہووے تاں او وی گھدی ونجے تے معاشرتی سطح تے جیرھے اقدامات دی ضرورت ہوووے او وی کیتے ونجن ۔انہاں اے گالھ خمیس کوں ووٹر اں دے قومی ڈیدنھ دے حوالے نال ایوان صدر اچ تھیونڑ آلی تقریب توں خطاب کریندے ہوئیں آکھی ،تقریب اچ وفاقی وزیر داخلہ تے چیف الیکشن کمشنر وی شریک ہن۔ صدر ممنون حسین آکھیا جو اج اساں ووٹراں دا قومی ڈینھ ایں خوشخبری نال منیندے پیوں جو اساڈا نظام جدید عہد اچ داخل تھی گیا ہے ۔انہاں آکھیا جو موبائل فون ایپلی کیشن دے افتتاح دے بعد پاکستان دا ہر ووٹر ایندی مدد نال اپنڑے ووٹ متعلق ساری تفصیل پتہ لا سگسی ۔صدر ممنون حسین آکھیا جو او انتخابی عمل کوں انفارمیشن ٹیکنالوجی اتے جدید رجحانات توں ہم آہنگ کریندے ہوئیں ناخواندہ اتے گھٹ آمدنی آلے طبقے دا خیال وی رکھیا ونجے تے پرانڑیں طور طریقیں تے جدید ٹیکنالوجی وچال ایجھا توازن پیدا کیتا ونجے جیں نال نظام دی فعالیت اچ کوئی رکاوٹ نہ آوے ۔ تقریب توں چیف الیکشن کمشنر اتے سیکرٹری الیکشن کمیشن وی خطاب کیتا۔