اسلام آباد ۔ 21 دسمبر (اے پی پی)وزیراعظم شاہد خاقان عباسی نال اقوام متحدہ اقتصادی و سماجی کمیشن برائے ایشیاءو بحرالکاہل دی انڈر سیکرٹری جنرل ڈاکٹر شمشاد اخترملاقات کیتی اتے پائیدار ترقیاتی اہداف تے تیزی نال عملدرآمدکیتے چیلنجز اتے مواقع تے گالھ مہاڑکیتی۔ وزیراعظم رکن ملکاں وچال پائیدار نمو اتے اقتصادی تعاون دے ودھارے کیتے کمیشن دے مقاصد کوں ودھارا ڈیونڑ کیتے ڈاکٹر شمشاد اختردی تعریف کیتی۔ وزیراعظم نتیجہ خیز منصوبہ جات، تکنیکی معاونت دے نال نال غربت اچ کمی، تجارت، سرمایہ کاری، انفارمیشن اینڈ کمیونیکیشن، سماجی ترقی اتے آفتاں دے خطرے کوں گھٹ کرنڑ کیتے رکن ملکاں دی استعداد ودھاونڑ ، خطہ کون درپیش مسئلیاں دے حل سانگے اقوام متحدہ اقتصادی و سماجی کمیشن برائے ایشیاءو بحرالکاہل دی قابل قدر خدمات دی تعریف کیتی۔ ڈاکٹر شمشاد اختر وزیراعظم کوں پائیدار سماجی و اقتصادی ترقی دے ودھارے کیتے سائنس، ٹیکنالوجی اتے جدت دی حامل حکمت عملی بارے ہک مفاہمتی یادداشت سانگے وزارت سائنس و ٹیکنالوجی کوں ڈتی ونجنڑ آلی مدد بارے ڈسائے۔
