جھنگ ۔ 09 دسمبر (اے پی پی) وزیر اعظم شاہد خاقان عباسی آکھیا ہے جوحکومت توانائی بحران مکاونڑ اتے عوام کوں اندھاریاںوچوں کڈھنڑ دا اپنڑاںوعدہ پورا کر ڈتے ،شفافیت نال بنڑائے گئے منصوبے ملکی تعمیر تے ترقی سمیت سی پیک سانگے چنگے اثرات مرتب کریسن، مخالف الزام تراشی دی بجائے حقیقت داسامنڑاںکرین اتے اپنڑے اپنڑے صوبے اچ چنگے کم کر تے ڈکھاونڑ۔انہاں آکھیا جو ملک اچ الائنسز اتے ٹیکنوکریٹ حکومت دی کوئی لوڑ کائنی ،حکومت اپنڑی آئینی مدت پوری کریسی اتے الیکشن 2018ءاچ ہی تھیسن، آئندہ الیکشن وقت تے کراونڑ سانگے پی پی پی ، پی ٹی آئی سمیت بئیاںسیاسی تے جمہوری جماعتاں کوں سینٹ اچ انتخابی اصلاحات دے بل تے صلاح ڈیونڑ پوسی۔ انہاں آکھیا جواساں سیاست محمد نواز شریف توں سیکھی، جنہاں نجی محفلاں اچ کڈاہیں وی مخالف تے طعنہ بازی نی کیتی ، 22مہینے دے دھرنیاں ملک کوں کئی سال پچھی تے دھیک ڈتے ،اساں جیرھے منصوبے شروع کیتے انہاں دی مثال گزریل 70سالاں دی تریخ اچ نی ملدی ،میگا پاور و ٹرانسپورٹ اتے بئے پراجیکٹ نہ صرف شروع کیتے بلکہ انہاں کوں پورا وی کیتے، ملک کوں چنگی اتے خوشحا ل ریاست بنڑاونڑ سانگے سارے جمہوری اداریاں کوں آئینی حدود اچ راہندے ہوئیں اپنڑاں کردار ادا کرنڑ پوسی ۔ہفتہ کوں تریمو بیراج جھنگ دے نیڑے 1263میگا واٹ دے ایل این جی کمبائن سائیکل پنجاب پاور پلانٹ حویلی بہادر شاہ جھنگ دا سنگ بنیاد رکھیندے ہوئیں تقریب توں خطاب دے دوران انہاں آکھیا جوانہاں کوں ڈھگ ساری خوشی ہے جو گیس نال چلنڑ آلے چوتھے پنجاب پاور پلانٹ دا سنگ بنیاد رکھ ڈتا گئے،جیندا پہلا مرحلہ 14مہینے اچ پورا تھی تے 810میگا واٹ بجلی ڈیسی جڈانجو26مہینے اچ کل 1263میگا واٹ بجلی نیشنل گرڈ اچ شامل تھی ویسی ۔انہاں آکھیا جواتحاد بناونڑ آلیاں دا صفر جمع تے صفر مساوی صفر ہی ہوسن، ایں نظردے جو مخالف الیکشن توں بھجنڑچاہندن، صرف مسلم لیگ (ن) ہی وقت تے الیکشن چاہندی ہے، اساں ترقیاتی منصوبیاں دے حوالے نال ہر صوبے نال تعاون کیتے، مسلم لیگ (ن) دی وفاقی حکومت کہیں وی صوبے نال تفریق نی کیتی ،اساڈی حکومت منصوبیاں کوں وختی پوراکرنڑ دی کوشش کریندی پئی ہے اتے ملک دے ہر صوبے اچ ارباں ڈالر مالیت دے منصوبے مکمل تھیندے پن ۔انہاں آکھیا جو محمد نواز شریف مئی 2013ءدے الیکشن دے موقع تے عوام نال وعدہ کیتا ہا جوا وہ ملک کوں لوڈ شیڈنگ اتے اندھاریاں توں کڈھسن ،انہاں وزیر اعظم بنڑدے ہی پنجاب دے متحرک ، محنتی تے فرض شناس وزیر اعلیٰ محمد شہباز شریف سمیت وفاقی کابینہ اتے بئیا ںقائمہ کمیٹیاں سمیت تھنک ٹینک نال مشوریاں دے بعد بجلی دے نویں منصوبے شروع کرنڑ دافیصلہ کیتا، اگرا یہ پاور پلانٹ نہ بنڑدے تاں بجلی دی گھٹکی پوری نہ تھیندی۔انہاں آکھیا جوایہ منصوبہ 80ارب روپے دی لاگت نال بنڑسی،پوری دنیا اچ ڈھگس ارے ایجھے منصوبے لگدن پر اتنی گھٹ لاگت اتے گھٹ وقت اچ کوئی منصوبہ وی مکمل نی تھیا،منصوبہ 14مہینے دی گھٹ مدت اچ پورا تھیسی ۔وزیر اعظم آکھیاجو اگر حساب کیتا ونجے تاں پاکستان پیپلز پارٹی رینٹل پاور دے منصوبے تے 30مہینے لا تے ہک کلو واٹ وی بجلی نہ بنڑائی جڈانجو ملک 80ارب روپے دا مقروض تھی گیا،اساڈی اتے گزریل حکومت دی کارکردگی اچ ایہو فرق ہے۔ انہاں آکھیا جو2013ءاچ جداں اساڈی حکومت آئی تاں توانائی بحران دا حل مشکل لگدا ، اساکوں 10ہزار میگاواٹ بجلی دی ضرورت ہائی ،جیرھا ہک وڈا چیلنج ہا ۔انہاں آکھیا جو اساں گزریل 70سال دی کارکردگی دے آدھے کم پنج سال اچ کریسوں ،اساں اے چیلنج پورے کر تے اج بجلی دی ضرورت نہ صرف پوری کر ڈتی ہے بلکہ 2030ءتئیں بجلی دیاںضرورتاں پوری کرنڑ سانگے وی کم شروع کر ڈتن ۔ وزیر اعظم آکھیا جو اگر وزیر اعلیٰ پنجاب محمد شہباز شریف نہ ہوندے تاں ایہ منصوبے مکمل نہ تھیندے۔ انہاں آکھیا جو شہباز شریف کوں 6ہزار میگاواٹ بجلی بنراونڑ دے منصوبے لاونڑ دی ذمے داری ڈتی گئی جنہاں وچوں ڈو پنجاب ، ڈو وفاق اتے ہک سی پیک دا منصوبہ ہا ،جیرھے وختی پورے کر گھدے ویسن جائیں گے ۔ انہاں آکھیا جو ا ج تنقید کرنڑ آلیاں آمر دی حکومت آلے پاسے گھن ونج تے ڈکھاونڑچاہندوں جیندے دور اچ ایجھے منصوبے418 ڈالر دے مقابلہ اچ 840ڈالر فی کلو واٹ تے لاتے گئے اتے پور ے نہ تھی سگے ،اساڈی حکومت ا وہ منصوبہ پورا کیتے۔ انہاں آکھیا جوجمہوری اتے آمر حکومتاں وچال ایہو فرق ہے۔ انہاں آکھیا جو اساں اپنڑی شفافیت اتے کارکردگی تے قائم ہسے ، اساکوں ایں گالھ دا پورا یقین ہے جو ملک وچوں مستقبل سانگے وی لوڈ شیڈنگ مک گئی ہے ۔انہاں آکھیاجو صرف بجلی چوری کرنڑ آلے علاقیاں اچ لوڈ شیڈنگ تھیندی پئی ہے ۔انہاں آکھیا جو ترقیاتی منصوبایں دے حوالے نال ہر صوبے نال تعا ون کیتے اتے 18ویں ترمیم دی وجہ کنوں سارے صوبیاں کوں وسائل ڈتن۔ وزیر اعظم آکھیا جو سارے صوبیاں کوں آکھے جو اوہ بجلی دیاں کمپنیاں گھن تے خود چلاونڑ،جڈانجو بجلی دے وڈے ترقیاتی منصوبے وفاقی حکومت بنڑیندی پئی ہے۔ انہاں آکھیا جو 18ویں ترمیم دے بعد اساں ساریاں کوں رل مل تے عوام دی خدمت دے منصوبے لاونڑ پوسن ۔ انہاںوزیر اعلیٰ پنجاب کوں مبارخ ڈیندے ہوئیں آکھیا جو انہاں دی ٹیم اچ شامل احد چیمہ جئے بندیاں دی کارکردگی تعریف دے قابل ہے ۔ انہاں آکھیا جو وڈے وڈے سورمے وی10، 10سال اچ منصوبے مکمل نی کر سگدے، پر اساڈے نوجوان مہیناں اچ منصوبے پورے کریندے پن، جیرھا پوری دنیا اچ ہک ریکارڈ ہے۔ وزیر اعظم امید ظاہر کیتی جواساںاپنڑے مشن کوں پوراکر گھدے اتے آندے اگست دے الیکشن اچ عوام فیصلہ کریسی اتے فیصلہ کرنڑ دی طاقت وی عوام کول ہونڑ چاہیدی ہے، کہیں بئے کنوں نی ہونڑ چاہیدی۔ تقریب توں وزیر اعلیٰ پنجاب محمد شہباز شریف وی خطاب کیتا جڈانجو تقریب اچ وفاقی وزیر پاور سردار اویس احمد خان لغاری ، وزیر مملکت پاور عابد شیر علی ، وزیر مملکت چوہدری انور جاوید ، صوبائی وزیر منصوبہ بندی تے ترقی ملک ندیم کامران ، چین دے سفیر ژاﺅ جنگ ،جرمنی دے سفیر ، سیمینزجرمنی دے سی ای او ، سی میک چائینہ دے صدر ژان جن ، پنجاب پاور کمپنی دے سی ای او اتے سیکرٹری ، وفاقی تے صوبائی وزیراں ،پارلیمنٹ دے ارکان ، کاروباری تے صنعت کار برادری نال تعلق رکھنڑ آلے لوکاں شرکت کیتی ۔
