اسلام آباد ۔ 3 دسمبر (اے پی پی) وفاقی وزیر ریلوے خواجہ سعد رفیق آکھیا ہے جو آئین دی سربلندی اتے قنون دی حکمرانی تے کوئی سمجھوتہ کائناں کیتا ویسی، جمہوریت کوں چلنڑڈیونڑچاہیدے، قیادت دا فیصلہ عوام کنوں ہونڑ چاہیدے، مصنوعی سیاسی جماعتاںکڈاہیں وی کامیاب نی تھی سگدیاں ، محمد نواز شریف کوں ووٹ دی طاقت نال پارٹی دا قائد بنڑایا ہے، مخدوم جاوید ہاشمی جئے لوک سیاسی جماعتاں دا اثاثہ ہوندن۔ انہاں خیالیںدا اظہار وفاقی وزیر اتوار کوں اتھاں اسلام آباد وچ مقامی ہوٹل وچ ادبی تے ثقافتی تنظیم ”آئینہ“ دے زیر اہتمام بزرگ سیاستدان مخدوم جاوید ہاشمی دی کتاب دی تقریب رونمائی توں خطاب کریندے ہوئیں کیتا۔ خواجہ سعد رفیق آکھیا جو مخدوم جاوید ہاشمی نال تعلق بہوں پرانڑاں ہے اتے ا وہ انہاں دے آئیڈل رہنما ہن، اساں ڈھگ سار ا وخت کٹھے گزاریا بلکہ پرویز مشرف دے دور وچ ٹارچر سیل وچ وی کٹھے رہے ہسے، مشکلاں دا ا وہ دوراساں کٹھے برادشت کیتا، جڈاں ا وہ پاکستان مسلم لیگ (ن) توں وکھرے تھئے اوہ ویلھا اساڈے کیتے اذیت دا مرحلہ ہا۔ انہاں آکھیا جو سیاسی جدوجہد اتے قربانیاں ڈیونڑ آلے کارکناں کوں سینے نال لاونڑدی ضرورت ہوندی ہے اتے جاوید ہاشمی جئے لوکاں کوں سراں دا تاج بناونڑ چاہیدے پرسیاسی جماعتاں دا اے المیہ ہے جو لڑن آلے لوک انج ہوندن اتے حکومت کرنڑ آلے انج ہوندن، جماعت توں علیحدگی دے باوجود اساڈا تے جاوید ہاشمی دا تعلق نی ترٹا، انہاں دی جدوجہد تے کوئی پانڑیں نی پھیر سگدا۔ خواجہ سعد رفیق آکھیا جو فوجی آمریت اتے فوج دا پیشہ ورانہ کردار ڈوانج انج شئیں ہین اتے ڈوہائیں وچال زمین تے آسمان دا فرق ہے، افواج پاکستان کوں متنازع بناونڑ توں بچنڑاں چاہیدے۔ خواجہ سعد رفیق آکھیا جومسلم لیگ (ن) اتے انہاں بذات خود عدلیہ بحالی تحریک وچ حصہ گھدا اتے ا وہ جیل وی گئے، اساں ساریاں دا آزاد عدلیہ دا ہک خواب ہا جیکوں شرمندہ تعبیر کرنڑ سانگے اساں قربانیاں ڈتیاں پر اگر ایجھے فیصلے آئے جنھاں تے سوال چاتے ونجنڑ تاں قوم اینکوںکائناں منیسی، نظریہ ضرورت کوں دفن کرنڑ پوسی۔ انہاں آکھیا جو سیاستداناں توں غلطیاں تھیندیاں ہن اتے ا وہ غلطیاں توں سیکھ تے اگی تے ودھدے ہن، غلطیاں توں سیکھنڑ دا عمل جمہوریت نال جڑیا ہویا ہے، جمہوریت کوں چلنڑ ڈیونڑچاہیدے، اگر ایندے وچ دخل جاری رہیا تاں جمہوریت ترقی نی کر سگدی۔ خواجہ سعد رفیق آکھیا جو قیادت بنڑن وچ 30توں 40سال دا عرصہ لگدے، مصنوعی سیاسی جماعتاں کڈاہیںکامیاب کائناں تھسین ، اساںعدالتی نا اہلی دے باوجود ووٹ دی طاقت نال محمد نواز شریف کوں پارٹی دا قائد بنڑایا ہے کیونجو اساں سمجھدوں جو اساں طاقتور ہمسایاں وچ وسدوں، ایںصورتحال وچ اندرونی اتحاد دی ضرورت ہے۔ خواجہ سعد رفیق آکھیا جو میثاق جمہوریت 1973ءدے آئین دے بعد ہک اہم دستاویز ہے، اگر بی بی شہید نہ ہوندی تاں اج دا پاکستان مختلف ہوندا، بی بی دی شہادت دے بعد محمد نواز شریف ای تجربہ کار قیادت ہے۔ انہاں آکھیا جو سیاست دی لڑائی سیاست دے میدان وچ لڑن چاہیدی ہے اتے اینکوںعدالت وچ گھن ونجنرتوں بچنڑاں چاہیدے۔انہاں آکھیا جو ایہ گالھ وی سمجھنڑ دی ہے جو ایں ملک وچ 16 وزراءاعظم آئے، کیا اوہ سارے غلط ہن جنہاں کوں باہر کیتا گیا۔ انہاں آکھیا جو جڈاں سیاستداناں کوں کدھ نال لاتا ویسی تاں ول نعرہ لگدے اتے ایندے بعد تحریک بنڑویندی ہے۔ انہاں آکھیا جوکجھ شئیںتے کنفیوژن نی ہونڑ چاہیدی، آئین تے قنون دی بالادستی مقدم رکھنڑی چاہیدی ہے، کجھ بندیاں کوںقوم دے فیصلیاں دا اختیار نی ہونڑ چاہیدا، 1973ءدے آئین تے اتفاق رائے موجود ہے اتے ایندے تے کوئی سمجھوتہ نی کیتا ونج جا سگدا۔ انہاں آکھیا جو سیاستداناں کوں اپنڑے رویے وچ شائستگی گھن آونڑ پوسی، جاوید ہاشمی جئے لوک سیاسی پارٹیاں دا اثاثہ ہوندن، جماعتاں کوںچلنڑڈیونڑچاہیدے اتے مصنوعی سیاسی قیادت پیدا کرنڑ توں بچنڑاں چاہیدے۔ انہاں آکھیا جو جاوید ہاشمی جمہوریت، جمہوری اقدار اتے جمہور دی لڑائی بے جگری نال لڑی ہے۔
