بیجنگ۔ یکم دسمبر (اے پی پی) چین پاکستان دے نال اہم بنیادی ڈھانچے دے منصوبے شروع کرنڑ دا خوہشمند ہے ۔ انہاں خیالیں دا اظہار چین دے وزیراعظم لی کی چیانگ روس دے شہر سوچی وچ پاکستانی وزیراعظم شاہد خاقان عباسی دے نال ملاقات دے دوران کیتا۔ ڈوہائیں رہنماواں آزاد تجارتی زونز بنڑاونڑ بارے وی خیالیں دا تبادلہ کیتا۔ جمعہ کوں چینی روزنامے ”چائنہ ڈیلی “دی رپورٹ مطابق چینی وزیراعظم آکھیا جو ڈوہائیں ملک گزریل چار سال توںسے سی پیک بنڑاونڑ سمیت مختلف شعبیں وچ ہک بئے نال وڈا تعاون رکھیندے ہن ۔ انہاں آکھیا جو ڈوہائیں ملک پیداواری استعداد ودھاونڑ اتے ہک بئے دے تعاون دے فروغ دے خواہشمند ہن اتے آزاد تجارتی زونز دے خواہشمند ہن تاں جو تجارتی توازن کوں فروغ مل سگے اتے ڈوہائیں ملکاں وچال کاروباری تعلقات ہور زیادہ پکے تھیونڑ۔ چینی وزیر اعظم لی کی چیانگ جنوبی ایشیاءملک دے شہریاں اتے چینی کمپنیاں کوں ڈتی گئی سکیورٹی تے اپنڑے پاکستانی ہم منصب دا شکریہ ادا کیتا۔ انہاں توقع ظاہر کیتی جو ڈوہائیں ملکاں وچال اقتصادی تعاون دے فروغ سانگے سازگار ماحول فراہم کرنڑ کیتے سکیورٹی کوں ہور چنگا بنڑایا ویسی۔ لی کی چیانگ آکھیا وج چین شنگھائی تعاون دی تنظیم دے حکومتی سربراہواں دے اجلاس وچ پاکستان دی بطور رکن ملک پہلی واری شرکت دا خیر مقدم کریندوں۔ انہاں آکھیا جو چین شنگھائی تعاون دی تنظیم اتے علاقائی امور جئے کثیر الجہت شعبیں دے وچ تبادلیاں اتے تعاون دے فروغ دا خواہشمند ہے۔ وزیراعظم شاہد خاقان عباسی آکھیا جو پاکستان چین دے نال مختلف شعبیں وچ اعلیٰ سطح دے تبادلیاں اتے بھرپورتعاون سانگے تیار ہے۔ انہاں آکھیا جو پاکستان باہمی تعاون تے مبنی منصوبیں دے تحفظ سانگے اقدامات کریسی۔ چین دی قیادت وچ شنگھائی تعاون دی تنظیم ترقی دیاں بئیاں منزلاں طے کریسی۔
