اسلام آباد ۔ 5 دسمبر (اے پی پی) پاکستان بلائنڈ کرکٹ کونسل ( پی بی سی سی) پنجویں عالمی بلائنڈ کرکٹ کپ دے شیڈول کوں اخیری شکل ڈے ڈتی گئی۔ عالمی بلائنڈ کرکٹ کپ آندے مہینے 7 توں 21 جنوری 2018ءتئیں پاکستان اتے متحدہ عرب امارات اچ ہکے ویلھے شروع تھیسی۔ ٹورنا منٹ اچ پاکستان سودھے ست بئے ملکاں دیاں ٹیماں وی کھیڈسن۔ قومی بلائنڈ کرکٹ ٹیم دے کوچ اتے سابق کپتان عبدالرزاق آکھیے جو پنجویں عالمی بلائنڈکرکٹ کپ دیاں تیاریاں مکمل کر گھدیاں گین۔ ورلڈ کپ کیتے نویں اتے پرانڑے کھیڈاڑیاں دی ٹیم چنڑ گھدی گئی اے، امید اے جو اے ٹیم ورلڈ کپ اچ چنگاں کھیڈدے ہوئیں ٹائٹل آپنڑے ناویں کر گھنسی۔اے پی پی نال الیندے ہوئیں سابق کپتان دا آکھنڑ ہا جو پاکستان بلائنڈ کرکٹ کونسل دی سلیکشن کمیٹی ورلڈ کپ کیتے 18کھیڈاڑیاں دے ناں شارٹ لسٹ کرتے اخیری منظوری کیتے پی بی سی سی دے چیئرمین کوں بھجوا ڈتی اے۔امیداے جو کجھ ڈینہاں اچ ٹیم دا اعلان کرڈتا ویسی۔انہاں آکھیے جو ورلڈ کپ دی تیاری کیتے قومی کھیڈاڑیاں دا تربیتی کیمپ 22 دسمبر توں لاہوراچ لگسی اتے انہاں کوں جدید اتے چنگی معیار دی تربیت ڈتی ویسی۔انہاں آکھیے جیہڑے کھڈاڑی چنڑیے گین انہاں کو ڈو مرحلیاں اچ چنڑاو کیمپاں اتے چار قومی ٹورنامنٹس اچ چنگاں کھیڈنڑ تے شامل کیتا گئے۔ورلڈ کپ کیتے تجربہ کار اتے نویں کھیڈاڑی ٹیم دا حصہ ہوسن اتے انہاں توں چنگے کھیڈ دی توقع اے۔انہاں آکھیے جو عالمی کپ اچ بھارت، سری لنکا اتے پاکستان وچال سخت مقابلے دی توقع اے۔ امید اے جو فائنل تئیں پج تے ٹورنامنت جیت تے ولسوں۔انہاں آکھیے جو لگدے فائنل اچ پاکستان دا مقابلہ بھارت یا سری لنکا نال تھیسی۔
