فاٹا اصلاحات دے عمل کوں علاقے دے عوام دے منشاءمطابق توڑ پجایا ویسی ،قبائلی علاقیں دی ترقی حکومت دی پہلی ترجیح اے ۔ وزیراعظم شاہد خاقان عباسی

اسلام آباد ۔ 17 جنوری (اے پی پی) وزیرِاعظم شاہد خاقان عباسی آکھیے جو قبائلی علاقیں دی ترقی حکومت دی پہلی ترجیح اے ،موجودہ حکومت پہلی واری فاٹا دے مسلیں دے حل کیتے سنجیدہ کوشش کیتی ،فاٹا اصلاحات دے عمل کوں علاقے دے عوام دے منشا مطابق توڑ پجایا ویسی ۔انہاں اے گال قبائلی علاقیں دیاں مختلف ایجنسیاں نال تعلق رکھنڑ آلے مسلم لیگ ن دے صدور، نائب صدور اتے جنرل سیکریٹریز تے مشتمل وفد نال گال بات کریندے ہوئیں آکھی ،جنہان بدھ کوں وزیراعظم آفس اچ انہاں نال ملاقات کیتی ۔وفد دی قیادت وزیر مملکت سیفران غالب خان کریندے پے ہن ۔ ملاقات اچ فاٹا اصلاحات، قبائلی علاقہ جات دی تعمیر و ترقی تے علاقے توں متعلق امور تے گال بات تھی۔ وفد نال گال بات کریندے ہوئیں وزیراعظم شاہد خاقان عباسی آکھییا جو قبائلی علاقہ جات دے عوام دی تعمیر تے ترقی حکومت دی پہلی ترجیح اے ۔انہاں آکھیا جو ملکی تاریخ اچ پہلی واری اساڈی حکومت نہ صرف فاٹا دے مسلے دے حل کیتے سنجیدہ کوشش کیتی بلکہ ایندے تے عملی طور تے کم کیتے ۔انہاں آکھیا جو فاٹا اصلاحات دا عمل شروع تھی گے ایں عمل کوں فاٹا دے عوام دے منشے دے مطابق توڑ پجایا ویسی ۔ فاٹا انضمام تے گال کریندے ہوئیں وزیراعظم آکھیا جو حکومت سمجھدی اے جو فاٹا اصلاحات تے انضمام دے عمل کوں مرحلہ وارتوڑ پجایا ونجے توں ایں عمل نال سارے جڑیے امور تے مسلیں دا حل کڈھیا ونجے ۔انہاں آکھیا جو فاٹا دے عوام کوں قومی دھارے اچ گھن آونڑ سانگے ضروری اے جو اتھاں تعمیر تے ترقی دے عمل کوں ودھارا ڈتا ونجے ۔وفد دے ارکان فاٹا اچ اصلاحات دے عمل کوں شروع کرنڑ تے قبائلی علاقہ جات تے کئی سالاں توں کالے قانون دے خاتمے دے سلسلے اچ عملی اقدامات کرنڑ تے وزیراعظم دا شکریہ ادا کیتا ۔