بیجنگ ۔ 3 جنوری (اے پی پی) چین آکھیے جو پاکستان عالمی دہشتگردی مکاونڑ کیتے شاندار قربانیاں ڈتین اتے خوب کارکردگی ڈکھائی اے، دنیا کوں پاکستان دیاں قربانیاں تسلیم کرنڑیاں چاہیدن۔ چینی وزارت خارجہ دے ترجمان گینگ شوانگ بیجنگ اچ ہک بریفنگ دے دوران ٹرمپ دی پاکستان تے تنقید دے حوالے نال آکھیے جو پاکستان دہشتگردی دے خلاف جنگ اچ غیر معمولی خدمتاں اتے کارکردگی ڈکھائی اے اتے عالمی برادری کوں چاہہیدے جو او پاکستان دیاں قربانیاں کوں منے۔انہاں ٓکھیے جو چینی کوں خوشی اے جو پاکستان علاقائی سلامتی اتے استحکام کیتے اپنڑا کردار ادا کرنڑ کیتے صرف باہمی احترام دی بنیاد تے عالمی دہشتگردی دا خاتمہ کرنڑ اچ رُدھا ہوئے، چین اتے پاکستان ہر اوکھے سوکھے ویلھے دے سنگتی ہین جیہڑے ہک بئے دے مفادات کیتے ہر ویلھے نال کھڑن۔انہاں دہشتگردی دے خلاف جنگ اچ پاکستان دے کردار دی تعریف کریندے ہوئیں آکھیے جو چین اتے پاکستان ہر حال اچ اسٹریٹجک شراکت داری برقرار رکھسن،چین پاکستان نال اپنڑے تعلقات کوں ہر شعبے اچ بیا اگو تے ٹورنڑ دا خواہشمند اے۔
