ورکنگ باونڈری تے بھارتی فورسز دی بلا اشتعال فائرنگ,پاکستان دی سخت مذمت

اسلام آباد ۔ 19 جنوری (اے پی پی) پاکستان دی بھارت ولوں سیالکوٹ سیکٹر اچ ورکنگ باونڈری تے بلا اشتعال فائرنگ دی سخت مذمت کریندے ہوئیں بھارتی ڈپٹی ہائی کمشنر کوں دفتر خارجہ سڈ تے احتجاج ریکارڈ کرائے۔دفتر خارجہ دے ترجمان ڈاکٹر محمد فیصل ولوں ڈسایا گئے جو بھارتی فورسز جمعہ کوں سیالکوٹ سیکٹر اچ ورکنگ باونڈری تے ہر پال دی وستی تے مارٹر گولے مارین اتے خود کار ہتھیاراں نال فائرنگ کیتی، جیں پاروں 24 سالہ نوجوان عرفان شہیداتے اہک تریمت سودھے 9 بندے زخمی تھی گین۔ڈائریکٹر جنرل (جنوبی ایشیا و سارک) محمد فیصل بھارتی ڈپٹی ہائی کمشنر کوں دفتر خارجہ سڈ تے بھارتی فورسزولوں بلااشتعال فائرنگ تے احتجاجی مراسلہ حوالے کیتے ۔ دفتر خارجہ آکھیے جو بھارت خبردار کرنڑ دے باوجود مسلسل لائن آف کنٹرول اتے ورکنگ باونڈری تے سیز فائر معاہدے دیاں خلاف ورزیاں کریندا پئے۔جنوری اچ ہنڑ تئیں بھارت کنٹرول لائن اتے ورکنگ بانڈری تے جنگ بندی دی125 توں ودھ خلاف ورزیاں کیتن جیں پاروں 4 بیگناہ افراد شہید اتے20 زخمی تھین۔ترجمان آکھیے جو خالی ہتھ شہریاںکوں نشانہ بنڑاونڑ غیر انسانی اتے غیر پیشہ ورانہ حرکت اے،بھارت سیز فائر معاہدے دی پاسداری کرے۔