اسلام آباد۔ 16 جنوری (اے پی پی) وزیراعظم شاہد خاقان عباسی آکھیا جو عوام کوں صحت ،تعلیم تے روزگار جیہی بنیادی سہولتاں ڈیونڑ حکومت دی پہلی ترجیح اے۔انہاں اے گالھ سندھ مدرسة الاسلام یونیورسٹی، گورنمنٹ سکولز لوئر ٹوپہ، لارنس کالج، سلک حطار اتے اسلام آباد ماڈل سکول برائے طالبات توں تعلق رکھنڑ آلے طالب علماں دے ڈو انج انج وفد نال گالھ مہاڑ کریندیں ہوئیں آکھی جنہاں منگل کوں وزیراعظم آفس اچ انہاں نال ملاقات کیتی۔وزیراعظم آکھیا جو تعلیم معاشرے دی ترقی دی کلید ہوندی اے اتے تعلیم نال ای نینگراں کوں زندگی دے چیلنجاں نال مقابلہ کرنڑ اتے معاشرہ دی ترقی سانگے آپنڑی صلاحیتاں دے مطابق کردار نبھاونڑ دے قابل بنڑایا ونج سگدے۔اے ملاقات نینگراں نال وزیراعظم دے رابطہ پروگرام دا حصہ اے جئیں دے تحت مختلف تعلیمی اداریاں دے طالب علماں کوں وزیراعظم آفس سڈیا ویندے اتے ملک دے اعلیٰ دفتراں دے کم کار بارے ڈسایا ویندے۔وزیراعظم پورے ملک اچ تعلیم دا معیار اُچا کرنڑ سانگے نصاب اچ ہم آہنگی تے وی زور ڈتا۔
