مسلم لیگ (ن) حکومتی نظام وڈے صاف شفاف انداز اچ چلائے ایں سانگے اساکوں کہیں این آر او دی ضرورت کائنی
اسلام آباد ۔ 22 جنوری (اے پی پی) وزیراعظم شاہد خاقان عباسی آکھیے جو این آر او دا سہارا چور گھندن ،اساں کوئی ڈاکہ نی ماریا ،مسلم لیگ ن حکومتی نظام وڈے صاف شفاف انداز اچ چلائے ایں سانگے اساکوں کوئی این آر او دی ضرورت کائنی ،مندے کڈھنڑ آلیں دےنال کیا سیاسی مکالمہ کیتا ونجے ؟انہاں دے نال گال آندے الیکشن تے تھیسی ،مسلم لیگ (ن) نواز شریف دی تصویر گھن تے ہی آندے الیکشن اچ حصہ گھنسی، ہر ادارہ اپنڑی حداچ رہ تے کم کریسی تاں بہتر ہوسی ،دنیا تے واضح کر ڈتے جو پاکستان توں ودھ افغانستان اچ امن دا خواہش مند کوئی وی کائنی ۔دہشت گردی دے خلاف پاک فوج جیرھا کردار ادا کیتے او پوری دنیا دی فوج کٹھی تے افغانستان اچ نی کر سگی ۔اے گال انہاں پارلیمانی رپورٹرز ایسوسی ایشن (پی آر آے) دی ایگزیکٹو کمیٹی نال ملاقات دے دوران کیتا جنہاں سنوار کوں وزیراعظم آفس اچ انہاں نال ملاقات کیتی ۔وزیراعظم شاہد خاقان عباسی پی آر اے دا خیر مقدم کریندے ہوئیں آکھیا جو اخباراں اچ شائع تھیونڑ آلی پارلیمنٹ ڈائری ہنڑ وی اساڈے حلقے اچ وڈا ا ثر رکھیندی اے تے وڈی دلچسپی نال پڑھی ویندی اے ،سیاسی گال بات تے مذاکرات دے حوالے نال ہک سوال دے جواب اچ انہاں آکھیا جو جیرھے لوک پارلیمنٹ تے لعنت بھیجیندے پن انہاں نال کیا گال کیتی ونجے ۔ساریں دے مستقبل دا فیصلہ عوام 2018دے الیکشن اچ کریسن ۔ہک سوال دے جواب اچ انہاں آکھیا جو دہشت گردی دے خلاف پاک فوج جیرھا کردار ادا کیتے او پوری دنیا دی فوج کٹھی تے افغانستان اچ نی کر سگی۔انہاں آکھیا جو نگران وزیراعظم دے حوالے نال فیصلہ قائد ایوان تے قائد حزب اختلاف دے سانجھے مشورے نال کریسوں ۔وزیراعظم آکھیا جو میں سازشاں تے یقین کائنی رکھیندا میڈے خلاف کوئی سازش کائنی تھیندی پئی ۔ عمران خان اتے زرداری صاحب طاہر القادری دے سٹیج تے بیٹھے ہن ۔جیرھے لوک مظاہرے کریندے پن انہاں دے مستقبل دا فیصلہ پاکستان دے عوام ہی کر سگدن ۔ہک بئے سوال دے جواب اچ انہاں آکھیا جو سینیٹ دے الیکشن وی تھی ویسن ۔پارلیمنٹ اچ ایجنڈے دیاں کاپیاں پھاڑنڑ دی بجائے ایشوز تے گال کیتی ونجے تاں بہتر ہوسی ۔ایوان اچ اپوزیشن دی ذمے واری ہوندی اے او ایشوز گھن تے آندی اے جیں تے ایوان اچ گال تھیندی اے ۔ہنڑ تئیں موجودہ اپوزیشن ہک ایجھا ایشو وی کائنی گھن آئی جیں تے بحث کرائی ونج سگے ۔ ختم نبوتدے حوالے نال انہاں آکھیا جو ایں ضمن اچ اساڈا موقف واضح اے تے مسلم لیگ ن دی حکومت بیک فٹ تے کائنی ۔راجہ ظفر الحق دی رپورٹ پوری جائزہ گھننڑ دے بعد ہی جاری کیتی ویسی ،سینیٹ اچ اے بل جڈاں منظور تھیندا پیا ہئی او ویلھے مسلم لیگ ن جیں گال دی نشاندہی کیتی ہئی اگر او من گھدی ویندی تاں نوبت اتھاں تئیں نہ پجدی ۔ہنڑ فیصلہ پاکستان دے عوام کرنڑاں اے ۔ایں توں پہلے پی آر اے دے صدر قربان بلوچ وزیر اعظم کوں پی آر اے دے قیام تے مقاصد نال ڈسایا۔ بعد اچ وزیراعظم شاہد خاقان عباسی کو ںپی آر اے ولوں یادگاری شیلڈ وی پیش کیتی گی ۔
