اسلام آباد ۔ 17 جنوری (اے پی پی) چیئرمین سینیٹ میاں رضا ربانی آکھیا جو پاکستان القدس الشریف بارے اجوکے امریکی اقدام دی ودھ ساری مخالفت کریندے، ایں فیصلے دے ذریعے امریکہ القدس الشریف دی تاریخ تے قانونی حیثیت دیاں دھجیاں اڈا تے نہ صرف بین الاقوامی قوانین بلکہ اقوام متحدہ دی سلامتی کونسل دیاں قرار داداں دی خلاف ورزی کیتی ہے۔ میاں رضا ربانی انہاں خیالاں دا اظہار تہران اچ منعقدہ اسلامی ملکاں دی پارلیمانی یونین دے 13 ویں سالانہ اجلاس اچ خطاب کریندے ہوئیں کیتا ۔ انہاں آکھیا جو اقوام متحدہ اچ فلسطین دے حوالے نال قرارداد دی حمایت دی وجہ توں پاکستان تے امریکی دباﺅ ودھ گے تے مسلم امہ کوں ایں گال دا احساس کرنڑاں چاہیدے ۔انہاں خبر دار کیتا جو عالمی منظر نامے تے تکھے بدلتی ہوئی صورت حال اچ امریکی ،اسرائیلی تے بھارتی گٹھ جوڑ ابھردا ہویا نظر آندے تے مسلم دنیا کوں رل تے ایندا مقابلہ کرنڑاں ہوسی کیوں جو اج پاکستان تے ایران زیر عتاب ہن تاں کل کہیں بئے اسلامی ملک دی واری ہوسی ۔شرکا توں خطاب کریندے ہوئیں میاں رضا ربانی آکھیا جو پاکستان فلسطین دے مسئلے تے فلسطینیاں دے موقف دی ودھ ساری حمایت کریندے تے پاکستان دی پارلیمان قرارداداں دے ذریعے فلسطینی عوام دے نال یکجہتی دا اظہار کریندے ہوئیں نہ صرف اسرائیلی بربریت دی مذمت کیتی بلکہ فلسطینیاں دی انجھ ریاست دے مطالبے دی حمایت وی کیتی اے ۔ میاں رضا ربانی او آئی سی اتے اسلامی ملکاں دی پارلیمانی یونین کوں مزید فعال تے چنگاں بنڑاونڑ دی ضرورت تے زور ڈتا ۔ انہاں ودھ ساری سطح تے معیشت، تجارت، سرمایہ کاری، تعلیم، صحت اتے سائنس و ٹیکنالوجی دے میداناں اچ وی سانجھے تعاون کوں ودھاونڑ تے زور ڈتا شرکا میاں رضا ربانی دے پرجوش خطاب تے ودھ ساری داد ڈتی تے انہاں دی شرکت کوں بہوں اہم قرار ڈتا ۔
