اسلام آباد ۔ 26 جنوری (اے پی پی) وزارت منصوبہ بندی، ترقی و اصلاحات ولوں ”رائزنگ پاکستان کمپین“ دا باقاعدہ آغاز کرڈتا گئے، مہم اچ 2013ءتوں 2018ءتئیں ملک دی اقتصادی ترقی بارے عالمی برادری کوں آگاہ کیتا ویسی۔ایں موقع تے وزارت منصوبی بندی اچ رائزنگ پاکستان کمپین دے افتتاھ ویلھے اپنڑے خطاب اچ وفاقی وزیر منصوبہ بندی، ترقی و اصلاحات احسن اقبال آکھیے جو 2013ءاچ ملک اندھاریں اچ بُڈا پیا ہا جیں پاروں کئی شعبے متاثر ہن، توانائی بحران ملک کوں اوکھ اچ سٹیا ہویا ہا بھی حکومت آندے ہی توانائی دا مسلہ حل کرنڑ کیتے تیکھے اقدام کیتن جیں پاروں اج ودھ بجلی موجود اے، لوڈشیڈنگ مکدی پئی اے اتے قومی معیشت اگو تے ودھدی پئی اے، ساڈی اقتصادی ترقی کوں پوری دنیا منیندی اے، امکان اے جو ایں مالی سال دے مکنڑ تئیں معاشی ترقی6 فیصد تے پج ویسی۔اے ہک تیزی نال اگو تے ودھدے رائزنگ پاکستان دیاں نشانیاں ہین جو ڈاہ سالاں دے مقابلے اج قومی معیشت دی شرح نموسب توں ودھ رہی اے، توانائی دے شعبہ اچ وی 11 ہزار میگاواٹ توں ودھ بجلی سسٹم اچ رَلی اے، اے کوئی معمولی کارکردگی نئیں جیہڑی رائزنگ پاکستان دی عکاس اے۔انہاں آکھیے جو حکومت پہلے توں موجود موٹرویز اتے ہائی ویز دی لمبائی اچ سو فیصد ودھارا کیتے۔موٹر ویز کوں ہک ہزار کلومیٹر توں ودھا تے ساڈھے ترائے ہزار کلومیٹر توں ودھایا ویسی۔احسن اقبال آکھیے جو موجودہ دور حکومت اچ دہشتگردی تے قابو پاتا گئے، حکومت نیشنل ایکشن پلان، آپریشنز ضرب عضب اتے ردالفسادجھیاں کارروائیان کیتن اتے ایں سانگے کوئی امداد نئیں گھدی اتے امن و امان بحال کرنڑ کیتے اپنڑے وسائل استعمال کیتن۔انہاں آکھیے جو عالمی میڈیا پاکستان دی معیشت کوں ابھردی ہوئی معیشت قرار ڈیندا پئے،پاکستان دنیا دی تیزی نال ترقی کریندیاں پنج معیشتان اچ رلیے، ایندے تے ساکوں فخر کرنڑا چاہیدے جیکر اے سفر ایویں جاری رہیا تاں اقتصادی شرح نمو کوں 8، 10 فیصد تئیں ودھیسوں۔انہاں آکھیے جو حکومت ملک دا مثبت تشخص پیش کرنڑ کیتے دنیا کوں ڈسایا ویسی جو پاکستان امن ، سیاحت، کاروبار، صنعت ، صنعت اتے سرمایہ کاری سانگے بہوں محفوط ملک اے۔انہاں دعوت ڈتی جو پوری دنیا اچ راہنڑ آلے پاکستانی رائزنگ پاکستان مہم دا حصہ بنڑن۔پاکستان دے مضبوط برانڈ کوں اگونہا کرنڑ کیتے ہر پاکستانی اپنڑا کردار ادا کرے۔انہاں امید کیتی جو رائزنگ پاکستان کمپین کوں کامیاب بنڑاونڑ کیتے میڈیا اتے عوام سارے اگو تے ودھن۔
