ڈیووس ۔ 24 جنوری (اے پی پی) وزیر اعظم شاہد خاقان عباسی آکھیے جو سانجھی خوشحای دے مقصد دا حامل ” ہک خطہ ہک سڑک “ منصوبہ کئی ملکاں ،خطیں تے تہذیباں کوں کٹھا کریندے ہوئیں اقتصادی ترقی اچ معاون ثابت تھیسی،سی پیک منصوبے دے تحت پاکستان اچ مواصلات ، بنیادی ڈھانچے، توانائی دے وڈے منصوبیں تے کم تھیندا پے، منصوبے نال علاقائی تجارت کوں ودھارا تھیسی تے خطے دے عوام ہک ڈوجھے دے نیڑے آ ویسن ۔ اے گال انہاں بدھ کوں اتھاں 48ویں عالمی اقتصادی فورم اچ ” ہک خطہ ہک سڑک دے اثرت “ دے موضوع تے پینل مباحثے اچ اظہار خیال کریندے ہوئیں کیتا ۔پینل دے بئے مقررین اچ ایشین انفراسٹرکچر انویسٹمنٹ بینک دے صدر جن لی چن ، منیجنگ ڈائریکٹر سائی چن گلوبل لی چن ، چیف ایگزیکٹو آفیسر رشین ڈائریکٹ انویسٹمنٹ فنڈ کیرل دمتری آف ، چائنہ نیشنل مشنیری انڈسٹریل کارپوریشن دے چیئرمین رین ہانگ بن، سنگا پوردے وزیر چان چن سنگ اتے چیئر میں اے ای سی او ایم مائیکل ایس برک شامل ہن۔ وزیر اعظم شاہد خاقان عباسی جیرھے عالمی اقتصادی فورم دے صدر پروفیسر کلاس شواب دی دعوت تے فورم دے اجلاس اچ شرکت سانگے ڈو ڈینھ دے دورے تے ہن،انہاں تقریب توں خطاب کریندے ہوئیں آکھیا جو پاکستانی چینی صدر شی جن پنگ دے ایں شاندار اقدام کوں تحسین دی نظر نال ڈیکھدے جنہاں اپنڑے وژن دے ذریعے مستقبل کیتے عالمی رابطہ تشکیل ڈتا ہے۔ انہاں آکھیا جو اے اقدام کئی براعظماں تے ڈو رس اثرات دا حامل اے ۔واضح رہے جو پاکستان انہاں 80ملکاں اچوں ہک ہے جتھاں ”بی آر آئی“ گزرسیی تے پاک چین اقتصادی راہدری ایندا حصہ اے، بی آر آئی انہاں ملکاں توں لنگھدی اے جن دا عالمی جی ڈی پی اچ 40 فیصد حصہ ہے تے عالمی آبادی دا 60 فیصد ہن،چار بر اعظماں تے محیط نویں شاہرہ ریشم تاریخ اچ ساریں توں وڈے انفرا سٹرکچر پراجیکٹ قرار ڈتا ویندا پے ۔وزیرا عظم آکھیا جو اے منصوبہ تاریخ دے حامل ملکاں وچال تعلقات دا عملی مظہر اے ۔انہاں آکھیا جو ایں منصوبے دے تحت کئی ملکاں وچال اقتصادی سرگرمیاں دے نال نال وسیع رابطے قائم تھیسن ۔انہاں آکھیا جو چینی صدر شی جن پنگ دے ” ہک خطہ ہک سڑک “ وژن دی تعریف کریندے ہوئیں آکھیا جو پاک چین اقتصادی راہدری (سی پیک) ایں اقدام دا ہک اہم جزو ہے ۔انہاں آکھیا جو سی پیک منصوبے نال پاکستان اچ مواصلات ،بنیادی ڈھانچے ،توانائی دے وڈے وڈے منصوبیں تے کم تھیندا پے ۔انہاں آکھیا جو ایں منصوبے نال خطے دے ملک ہک ڈوجھے نال جڑ ویسن ۔علاقائی رابطے دے ذریعے خطے دے عوام ہک ڈوجھے دے نیڑے آویسن ۔انہاں آکھیا جو ایں منصوبے نال اقتصادی سرگرمیاں کوں ودھارا تھیسی تے اے خوشحالی دا باعث بنڑسی ۔ وزیر اعظم شاہد خاقان عباسی آکھیا جو اساکوں ایں منصوبے کوں پائیدار بنڑاونڑاں اے ،اساں سڑکاں ،بندرگاہیں تے انفرا سٹرکچر کوں جدید بنڑائے ۔انہاں آکھیا جو بیلٹ اینڈ روڈ اقدام دے مثبت اثرات پاکستان اچ پہلے ہی محسوس کیتے ویندے پن جیویں پاکستان اچ بجلی دے منصوبے قائم کیتے ویندے پن ، اساڈی صنعت اتے برآمدات اچ بہوں ودھارا تھے ۔ انہاں آکھای جوملکی سیمنٹ دی صنعت دی گنجائش اچ 56فیصد ودھارا تھے جڈاں جو سی پیک نال برآمدات اچ 15 فیصدودھار ا تھے ۔انہاں آکھیا جو اے خطے اچ معاشی استحکام دا اہم جزو اے ۔وزیراعظم آکھیا جو سی پیک نال ریلوے تے ہوائی اڈے اپ گریڈ کریندے پیوں ۔وزیراعظم آکھیا جو بی آر آئی مطلوبہ مالیاتی پائیداری دا حامل اے ایندا ماحولیات تے وی مثبت اثر پوسی ۔انہاں آکھیا جو سی پیک منصوبیں اچ ماحولیاتی آلودگی دی گھٹکی تے وی توجہ ڈتی گی اے ،فرنس آئل نال چلنڑ آلے گھٹ استعداد دے حامل پاور پلانٹس کوں نویں ٹیکنالوجی تے منتقل کریندے پیوں ۔ماحولیاتی تحفظ دے اقدامات اچ پاکستان ہک ذمے وار ملک دی حیثیت نال سامنڑے آیا ہے ۔پاکستان ماحول دوست ٹیکنالوجی کوں اپنایا ہے ۔وزیراعظم آکھیا جو سی پیک نال ملک اچ غیر ملکی سرمایہ کاری اچ ودھار تھے تے پاکستان اچ غیر ملکی سرمایہ کاراں دا اعتماد وی بحال تھے ۔انہاں آکھیا جو پاکستان اچ سرمایہ کاراں کوں ہکو جیہے موقع حاصل ہن تے انہاں کوں ہر ممکن سہولتاں ڈتیاں ویندیاں پن ۔انہاں آکھیا جو سی پیک معاشی استحکام دا علمبردار منصوبہ ہے تے پاکستان دے مثبت تشخص کوں نشابر کریندا پے ۔ وزیراعظم آکھیا جو ہک خطہ ہک سڑک دا منصوبہ علاقائی تجارت دے ودھارے اچ معاون ثابت تھیسی ۔ وزیر اعظم ایشین انفراسٹرکچر انویسٹمنٹ دے صدر دے خیالات نال اتفاق کریندے ہوئیں آکھیے جو حکومتاں کوں منصوبے دی تشکیل کیتے وسائل دے مناسب استعمال کوں یقینی بنڑاونڑاں چاہیدے تے ایہوجے منصوبے وضع کرنڑیں چاہیدن جیرھے جو مالیاتی طور تے موزوں ہوون ۔ وزیر اعظم آکھیا جو اساں بندرگاہیں ، ریلوے اتے شاہرات دے ذریعے وسطی ایشیاءدے ملکاں کوں رابطہ فراہم کریندے پیوں جیں نال نہ صرف پاکستان بلکہ پورے علاقے کوں فائدہ تھیسی ۔انہاں ایں یقین دا اظہار کیتا جو سانجھی معاونت نال منصوبے دی پائیداری اچ ودھارا تھیسی ۔انہاں آکھیا بیلٹ اینڈ روڈ اقدام 2018ءعالمی اقتصادی فورم دے اجلاس نال پورے طور تے شریک ملکاں اچ سانجھے مستقبل دا حامل اے ۔ وزیر اعظم ایں گال تے زور ڈتا جو بی آر آئی دے تحت منصوبہ جات نال سارے سرمایہ کاراں خاص طور تے مقامی سرمایہ کاراں کوں ہکو جے موقع دی فراہمی ضروری اے تاں جو ودھ توں ودھ فائدہ تھیوے ۔پینل مباحثے دے شرکاء علاقائی سانجھ کار تے صاف ستھرے انفراسٹرکچر دی توسیع دے اثرات تے روشنی پاتی تے منصوبے دے حوالے نال اپنڑے نقطہ نظر دا اظہار کیتا ۔ بئے مقررین وی منصوبے کوں فائدہ مند اثرات دا حامل قرار ڈیندے ہوئیں آکھیا جو اے خاص طور تے گھٹ ترقی آلے ملکاں کیتے اقتصادی طور تے سود مند ثابت تھیسی ۔ ایشین انفراسٹرکچر انویسٹمنٹ بینک دے صدرآکھیا جو منصوبے نال بالعموم بہبود تھیسی تے سانجھے فائدے دے ذریعے خدشات کوں مکاونڑ اچ مدد مل ویسی ۔ مباحثے دے چھیکڑ اچ میزبان شرکاءکوں منصوبے دی اہمیت کوں کجھ الفاظ اچ سانبھنڑ کیتے آکھیا تاں وزیراعظم شاہد خاقان عباسی آکھیابی آر آئی نال روزگار دے موقع پیدا تھیونڑیں چاہیدن جڈاں جو بئے مقررین مسلسل وسیع البنیاد مشاورت،سانجھے مواصلاتی رابطے، عالمی سانجھ کار دی ضرورت تے زور ڈتا ۔
