تاپی گیس منصوبہ نال خطے دی اقتصادی اتے سماجی حالت بدلسی،وزیراعظم شاہد خاقان عباسی

ہرات ۔ 23 فروری(اے پی پی) وزیراعظم شاہد خاقان عباسی آکھیے جو تاپی گیس منصوبہ نال خطے دی اقتصادی اتے سماجی حالت بدلنڑ اچ مدد ملسی،پاکستانی حکومت اتے عوام توں ودھ بیا کوئی وی افغانستان داخیر خواہ نئیں تھی سگدا،پاکستان دا امن افغانستان اچ امن اتے استحکام نال جڑیا ہویا اے۔مغربی افغانستان دے تاریخی شہر ہرات اچ پاکستان۔ترکمانستان۔افغانستان۔بھارت گیس پائپ لائن منصوبہ (تاپی) دے تحت بجلی، آپٹک فائبر اتے بنھاں منصوبیاں دی بنڑیاد رکھنڑ دی تقریب نال خطاب اچ وزیر اعظم شاہد خاقان عباسی تاپی گیس پائپ لائن منصوبے کوں اگو تے ٹورنڑ اچ ہتھ ونڈاونڑ کیتے افغانستان دا شکریہ ادا کیتے۔ انہاں آکھیے جو ترکمانستان دے صدر قربان گل بردی محمدوف گیس پائپ لائن دا جیہڑا تصور پیش کیتے اور توانائی راہداری اچ بدلدا پئے جیندے اچ انفارمیشن ٹیکنالوجی، اقتصادی زون، بجلی اتے رابطیان دے بئے منصوبے وی رل گن،ایں تاریخی منصوبے نال خطے دی سماجی اتے معاشی حالت بدل ویسی اتے امن وی یقینی بنڑاونڑ اچ مدد ملسی۔ انہاں پاکستان ولوں تاپنی منصوبے سانگے پورا ہتھ ونڈاونڑدی یقین دہانی کرائی۔وزیراعظم آکھیے جو پاکستان امن چاہندے ،پاکستانی حکومت اتے عوام توں ودھ بیا کوئی وی افغانستان اتے افغان عوام دا خیر خواہ نئیں تھی سگدا،افغانستان اچ امن نال ہی پاکستان اچ امن تھی سگدے، اساں افغانستان ہی نئیں پورے خطے اچ امن و استحکام اتے ترقی کیتے پرعزم ہیں،ساکوں امن، ترقی اتے خوشحالی دا اے سنیہڑا اگو تے پھیلاونڑاں چاہیدے۔