اسلام آباد ۔ 27 فروری (اے پی پی) صدر مملکت ممنون حسین آکھیے جو سی پیک منصوبہ پاکستان تے چین دے نال نال افغانستان سانگے وی ودھ ساری اہمیت رکھیندے کیوں جو افغانستان سمیت ماسکو توں گھن تے وسط ایشیا تئیں دا خطہ مستقبل اچ ایندے نال بہوں سارے فائدے حاصل کر سگدے ۔اے گال انہاں منگل کوں ایوان صدر اچ پاکستان اچ تعلیم حاصل کرنڑ آلے افغان طالب علماں تے بنڑائی ونجنڑ آلی دستاویزی فلم دی تقریب رونمائی توں خطاب کریندے ہوئیں آکھی ۔تقریب نال چیئرمین ہائر ایجوکیشن کمیشن پروفیسر ڈاکٹر مختار احمد تے پاکستان اچ افغانستان دے سفیرعمر زاخیل وال وی خطاب کیتا ۔ صدر مملکت آکھیا جو اقتصادی راہداری دی صورت اچ پاکستان اتے افغانستان سمیت بے ملکاں دے عوام ، خاص طور تے نینگراں سانگے ودھ سارے موقع پیدا تھیندے پن ۔ اقتصادی راہداری دے ناں دی وجہ اے سمجھنڑ درست کائناں ہوسی جو ایندا تعلق صرف پاکستان تے چین توں ہے بلکہ حقیقت اے ہے جو اے راہداری جتنی پاکستان تے چین دی ہے ،ایندے توں ودھ تے افغانستان دی ہے کیوں جو وسط ایشیا توں گھن تے روس تئیں دنیا دی بہوں وڈی آبادی ایں راہداری نال رلنڑ سانگے بے چین اے ۔انہاں مزید آکھیا جو ایں راہداری دے ذریعے جڈاں دنیا دے بہوں سارے خطیں وچال تجارتی تے اقتصادی رابطے دا سلسلہ شروع تھیا تاں ایندے نال ہی نویں علوم تے نویں ٹیکنالوجی وی ایں خطے اچ آسی ۔انہاں آکھیاافغان طالب علم جیرھی سکالر شپ تے پاکستان آئے ہن انہاں دا مقصد وی ایہو ہے جو آندے دور دے تقاضے تے پورا لہنڑ سانگے خود کوں تیار کر سگن ۔صدر مملکت آکھیا جو پاکستان تے افغانستان تے اساڈے بئے مخلص دوست افغانستان اچ امن تے سلامتی تے استحکام دے ودھارے سانگے کوشاں ہن ۔ صدر مملکت توقع دا اظہار کیتا جو افغان طالب علم واپس ونج تے پاکستان دے سفیر دی حیثیت نال وی کم کرن ۔ایں موقع تے انہاں پاکستان اچ زیر تعلیم افغان بالاں دی نصابی وہم نصابی سرگرمیاں متعلق پیش کیتی گی ڈاکو منٹری دی تعریف کیتی ۔
